NEW YORK, Merka, - “Nunka mi a usa kokaina te dia ku mi a konosé Whitney, Bobby Brown a afirmá den un buki di promé aparishon, kende ta eks esposo di kantante Whitney Houston.
New York Times a publiká algun adelanto.
E outobiografia di e músiko titulá “Bobby Brown: The Truth, The Whole Truth and Nothing But” lo sali riba merkado luna benidero.
E korant neyorkino djaweps último a publiká algun teksto.
Outobiografia di Bobby ta menasá konta tur sekretu di su matrimonio.
Kuminsando ku e deklarashon kuestionabel ku promé di tabata huntu ku Whitney, nunka el purba kokaina.
“Mi a eksperimentá ku algun droga, pero mariwana tabata mi opshon. Den un punto di mi bida mi a usa droga deskontroladamente. Mi tabata usa for di kokaina te heroina”, Bobby a skibi den su buki.
Riba su kontrovertido matrimonio di 15 aña ku e dama ganadó di premio Grammy, Brown a konkluí ku tabata un estupides for di promé momentu.
“Mi ta kere ku nos a kasa ku otro pa motibunan ekiboká. Awor mi a tuma nota ku Whitney ta’tin otro plannan diferente ku esnan di mi ora nos a kasa. Mi ta kere ku e tabata ke limpia su imágen, miéntras ami tabata ke pa stima mi i haña yunan”.
Segun Bobby, promé ku pensa kasa kuné, Whitney tabata bou di preshon enorme.
E medionan di komunikashon tabata akusá Whitney di mantené un relashon homoseksual ku su asistente Robin Crawford.
Whitney tabata e mucha muhé kerí di Amérika i tur esaki no ta bai bon ku su imágen.
Den e situashon di Whitney, e úniko solushon tabata kasa i haña yu. Esaki lo mata kualke tipo di spekulashon, no ta importá si e spekulashonnan ta bèrdat òf no.
Kier men, a kapturá mi den e kuenta i mi a terminá kasa ku un di e estreanan mas grandi di mundu.
Representante di Whitney Houston a deklará na revista People: “Houston ta tristu, pasobra pakiko Bobby ta’tin mester di papia e kosnan aki. Pero Whitney lo kohe e kaminda nobel, i e lo no papia malu di tata di su yu, ounke mester aklará e mentiranan”.
Hendenan sa bisa ku Whitney Houston tabata e mucha muhé di Iglesia i Bobby Brown e músiko drogadikto i problemátiko.
Sin embargo, nan a kasa na 1992, e mesun aña ku Whitney a protagonisá huntu ku Kevin Costner e pelíkula “Bodyguard”. Esaki tabata tòp di Whitney su karera.
Despues a sigui un seri kanselashon inesperá, komportashonnan no adekuá, i un pòtrèt ku a mustra un Whitney hopi flaku durante un show komo homenahe na Michael Jackson.
A okurí gòlpinan, denunsianan, Brown den prizòn, Whitney drentando i saliendo fo’i sentronan di rehabilitashon te divorsio definitivo na 2007.
Brown a trata anulá e divorsio alegando di no tin kas i a roga Whitney p’e regresá kuné.
Whitney, parse, tabata ke sera e kapítulo mas instabil di su bida.

Foto: Bobby Brown i Whitney Houston 1204

Bobby Brown, kende tabata esposo di Whitney Houston pa 15 aña, lo publiká su outobiografia luna benidero den kua e ta akusá su eks esposa di a kasa kuné djis pa kalma e rumornan di biseksualidat.