LA HABANA, Cuba, - Míles di cubano lo por optené títulonan di propiedat di bibienda ku aktualmente ta di Gobièrnu, segun regulashonnan publiká ayera, un medida ku lo por establesé basenan di reformanan mas amplio den e sektor.
Tabata e promé dekreto legal publiká formalmente fo’i dia ku Raúl Castro a remplasá su ruman Fidel Castro komo Presidente na febrüari último.
Televishon estatal tambe a bisa ku lo bai eliminá tòp salarial, pèrmitiendo empleadonan di e Estado gana tur loke nan por komo insentivo pa produktividat.
E restrikshonnan di bibienda i salarial tabata dos di e kosnan di e sistema sosialista ku mas ta iritá e cubanonan.
E dekreto di bibienda ta stipulá normanan ku ta pèrmití e cubanonan kendenan ta biba den apartamentu di hür òf kas di nan doño estatal ku nan por keda ku e propiedat despues ku nan bandoná nan trabou.
Nan por optené e títulonan di propiedat i inkluso laga esaki pa nan yunan òf famianan.
Míles di cubano lo por probechá di esaki, inkluyendo famianan di e militarnan, trahadónan di suku, trahadónan di konstrukshon, maestronan i dòkternan.
Keda ku kasnan di e Estado inisialmente kreá pa trahadónan spesífiko, tabata un práktika informal pero hopi ekstendé den bida cubano.
Tin un lei di 1987 ku ta stroba traspaso di dicho bibiendanan na su okupantenan, pero e medida nobo lo tin ku aklará su status legal.
“Ta manera legalisá tera di niun hende”, Oscar Espinosa Chepe a bisa, kende ta un ekonomista di train pa e Estado i kende a bira opositor di Gobièrnu.
“Esaki ta eliminá inseguridat ku hopi hende ta’tin i ta aliviá preshonnan burokrátiko”, el a agregá.
Pa lei, e cubanonan ainda no por bende nan kas ku niun hende sino ku Estado, ounke nan por kambia nan kas ku aprobashon di Gobièrnu, un proseso ku por tarda añanan.
Dos funshonario di “Instituto Nacional de Vivienda de Cuba” a bisa ku e lei duná di konosé ayera, probablemente lo forma parti di un seri di reforma relashoná ku bibienda.
Pero ámbos funshonario a opta pa keda anónimo, pasobra nan no ta outorisá pa papia ku medionan di notisia estranhero.
Nan a bisa ku “miles i míles di cubano lo bai keda benefisiá”, pero nan no a bisa sifra eksakto.
Espinosa Chepe, enkarselá pa su opinionnan polítiko durante un redada okurí na 2004 i kende a keda den libertat pa motibunan médiko, a bisa ku “duna títulonan di propiedat na hendenan lo por duna nan mas libertat pa bende nan kas i kisas hür nan, semper basta nan paga impuestonan”.
Cuba tin 11.2 mion habitante, kendenan ta sufri di un severo skarsedat di bibienda.
Gobièrnu a bisa ku tin mester mei mion kas, i opositornan a bisa ku e sifra ta dòbel di esei.

Foto: Cuba dama 1204

Un dama ta para na entrada di su kas na La Habana ayera.