AMSTERDAM / WILLEMSTAD - Korte di Apelashon na Amsterdam a konkluí ku no tin base pa prohibí eksistensia di e organisashon Hells Angels na Amsterdam. Komo tal, el a rechasá e petishon di Ministerio Públiko pa hasi esaki. Esei ta loke e ofisina di abogado di Hells Angels a anunsiá.
Korte di Apelashon a konkluí ku no tin base pa bisa ku Hells Angels ta un organisashon kriminal. Tampoko a keda probá ku nan lo ta hasi nan mes kulpabel na labamentu di plaka, manera un dje akusashonnan tabata bisa.
Segun abogado di Hells Angels Marnix van der Werf, Korte di Apelashon ta mas konvensí ainda ku korte den promé instansia, ku Ministerio Públiko ta kompletamente robes den e kaso aki.
Entretantu t’asina ku diferente korte den promé instansia i korte di apelashon a kuminsá ku tratamentu di kasonan sivil kontra eksistensha di Hells Angels.
Aparte di e kaso kontra e kapítulo di Hells Angels na Amsterdam – konsiderá komo esun ku ta liderá Hells Angels rònt Ulanda – tabatin mas kaba kontra e kapítulo na Limburg i na Friesland. Den tur e kasonan aki, Ministerio Publiko a pèrdè.
Van der Werf ta kere ku chèns ta grandi ku Ministerio Públiko, mirando e resultado di e kasonan ku ya kaba ta tras di lomba, lo legumai e otro kasonan ku awor aki ta pendiente.
“E kaso kontra Hells Angels Amsterdam tabata e kaso modelo. Awor ku OM a kai chikitu atrobe, tur kos ta mustra ku e kaso kontra e otro siudatnan ta básikamente pèrdí,” asina Van der Werf a bisa.
Outoridatnan tin algun aña kaba ku nan a lansa un ofensiva grandi kontra e organisashon Hells Angels na Ulanda, ku nan ta weta komo un grupo kriminal. E grupo aki lo ta hasi su mes kulpabel na asesinato, homisidio, ladronisia, trafikashon den arma, trafikashon den droga, estafa i tambe menasa.
E ofensiva a kuminsá despues di asesinato di 3 kompañero di Hells Angels na Geleen, Oirsbeek. Ta sospechá e propio Hells Angels di a mata nan tres kompañeronan, pa motibu di un dil di droga ku a frakasá.
E kaso aki bira interesante pa Kòrsou, komo ku tin dos yu di tera enbolbí. Angelo Diaz, kende a bira testigu prinsipal den e kaso aki i kende tambe tabata enbolbí den e dil di 293 kilo di kokaina. Pa su koperashon ku hustisia, a dun’é protekshon kompleto i a redusí e kastigu ku e mester a haña. Ademas, tin indikashon ku ta e mesun Hells Angels, lo a asesiná e hóben yu di Korsou Steven Chocolaad. A haña Chocolaad kòrtá na mochi den un riu na Ulanda.
Manera kos ta pinta aki, no ta masha probabel ku lo bin klaridat den e kaso di asesinato aki.
Te ku ayera, no tabata masha kla si Ministerio Públiko lo apelá e sentensia di Hells Angels Amsterdam òf ku e ta laga e kaso pa loke e ta.