Skina di Sorti, awe djasabra 12 di aprel di 2008, ta kuminsá ku deseá tur hende un bon dia. Riba e lokual a tuma lugá den Konseho Insular entre lider polítiko di DP, Norbert George i lider polítiko di NPA, Nelson Pierre, mi no ta gasta muchu palabra. E ta nada mas ku indikashon di lokual por fèrwagt di un proseso di deterioro denter di nos práktika polítiko ku no a kuminsá serka Nelson Pierre ni Norbert George. Nan ta mas bien otro víktima di un proseso sosio kultural di sostené i apoyá kanibalismo moderno.
****
Ta basta tempu kaba e polítikonan ku tabata forsa nan mes pa hiba un aserkamentu mas kulto, metódiko i di kontenido tabata wòrdu desprestigiá na fabor di práktika di poko preparashon i hopi teater, manipulashon di informashon i agreshon verbal. Den prensa mes tin diferente hende ku a kontribuí na e proseso degenerativo aki. Tantu Norbert George di DP komo Nelson Pierre di DP a entrega demasiado na e presentashon dramátiko i a bandoná e profilamente riba kontenido distintivo.
****
Mi ke rekomendá tantu Nelson Pierre, lider polítiko di NPA i Norbert George, lider polítiko di DP, pa reflehá riba e lokual ta nan “core competence” , retorná na hasi uso di e kalidat distintivo ku nan tin i laga e dramatisashon teatral pa esnan ku no t’asina dotá. Pais tin un sobre populashon di polítiko ku no tin e “bagage” pa ser un balor agregá. Si esnan ku por hasi un diferensia entregá nan mes na e mesun aserkamentu, kambio i kambio ta lokual mester, hamas i nunka ta tuma lugá. Pues, señores “cut the .... and get back to business”.
****
Entre otro nan tin di yuda pa yega na maneho válido (ku tin relashon ku nos problemanan). Den kestion di maneho, saber di bo realidat ta un dje elementonan di mas importante. Bo mester sa ta unda bo ta pará pa lokual ta bo rekursonan (kiko bo por saka for di nan), bo posishon ante kompetidornan (sa ta kiko bo ke hasi i kende ta esnan ku bo ta bai topa i kiko por fèrwagt di nan) i kual ta e faktornan relevante (nan lo influensiá e kuadro den kual bo tin di operá) i kon signifikante nan lo ta (nan probabel impakto).
****
Pa bo por alkansá bo meta, bo tin di krea un persepshon mas serka di realidat posibel di dje pa despues trasa e trayekto ku ta hiba bo di bo punto di salida (bo realidat di momentu) pa e posishon ku bo tin di alkansá pa realisá bo meta. Lokual mi ta skirbi aki ta informashon básiko ku bo ta topa den kualke “textbook” riba materia di maneho. Tòg e lokual gobièrnu ta hasi i sigur lokual hopi gobernante ta bisa no ta reflehá e siñansa aki.
****
Nos realidat ekonómiko ta di un pais ku un ekonomia super habrí, i konsekuentemente vulnerabel pa impakto di insidentenan den ekonomia global. Ku e posishon estatal nobo, nada no ta bai kambia den esaki. Den e proseso estatal nos no a hasi nada i no ta hasiendo nada pa krea un posishon a base di kual nos lo por ehersé influensia tampoko serka esnan ku si por impaktá faktornan relevante di ekonomia global. Komo ku nos no a definí e punto di salida ni esun kaminda nos mester yega, nos lo ripara e fayo ora ta lat kaba.
****
Un otro aspekto di nos realidat ekonómiko ta ku nos generamentu di devisa ta dependé di algun sektor kual su materia prima kritiko sea ta di tersera òf bou di esfera di influensia di otronan. Sektor finansiero ta lèn riba legislashon i e espasio ku Ulanda ta brinda nos (konsekuensia di e posishon den Reino). Refineria ta dependé di beis di presidente venezolano Hugo Chávez Frias. DOK tin di importá tur materia prima. Turismo ta dependé di kompanianan naviero i aviashon aheno. Atrobe mi tin di apuntá ku den e proseso estatal no a hasi nada pa Ulanda ku ta un “player” riba e plano global komprometé su mes pa duna “rugdekking” na e áreanan vital pa nos ekonomia. E ulandesnan mas bien ta keda hasi nos sektornan mas vulnerabel.
****
Otro aspekto di nos ekonomia ta e dependensia total di importashonnan stratégiko (pa logra kondishonnan básiko pa áreanan vital di nos eksistensia). Energia, materia prima i komestibel ta vital pa nos eksistensia i te ku dia di awe no tabata tin masha kos pa diversifiká e fuente dje faktornan aki. Ta deskuidá sektor agríkola, krio i peska (no tin nada struktural i sigur no tin avanse teknológiko pa oumentá produktividat), i no ta invertí sufisiente den utilisashon efektivo i masal di solo, laman i bientu.
****
Ulanda ku ta bon den agrikultura aki tambe ta lagando nos na kaya. “Met de wil elkander bij te staan” ta un kapítulo morto. Si Ulanda ke, e por enkontra masha hopi forma mes di inkorporá Kòrsou i demas islanan antiano den inkurshonnan sientífiko i teknológiko na benefisio mutuo. Pero e aserkamentu ta keda unu di e maestro ku ta supervisá algun mucha mala mucha, miéntras den banda di saka benefisio for di e echo ku e lugá kaminda e muchanan ta ubiká tin balor stratégiko.
****
Finalmente nos tin e realidat ku islanan chikitu semper ta trese pa lokual ta kosto di transporte i imposibilidat pa negoshá bon preis pa e marginalidat ku nos demanda ta nifiká. Te ku dia di awe no tin maneho ku ta trese nos mas serka di aliansanan stratégiko ku ta hasi nos parti di un masalidat ku por eksigí mihó kondishon. Nos ta pèrsistí den fragmentashon di merkado ku kompetensianan inútil i suisidal.
****
For di Ulanda bo ta mira mas utilisamentu di nos islanan komo lugá kaminda filial di kompanianan ulandes por tene “strooptochten”. Kasonan di korupshon ku tabata tin, ta konfirmashon di esaki. Ku SEI, ku ta e inisiativa sosial edukativo i ekonómiko a sigui den e rumbo tradishon di ayudo pa desaroyo, en bes di duna impulso real na un restrukturashon sosio ekonómiko i sosio kultural.
****
Trahamentu di lista di proyekto pa tuma lugá den e mesun filosofia i ideologia ku a kondusí na e situashon di nivel mental mediokre for di kual no ta surgi nada mas ku kopiamentu, “more of the same”, i e krema dje fluho di plaka ta bai den e saku dje mesun grupito di semper ku no ta e “doelgroep” ku mester saka benefisio dje fluho di plaka.
****
Lamentabel ta ora ku bo mira maneho ku mas bien ta intensifiká efekto di defisiensianan struktural ku nos realidat geográfiko i demográfiko ta kontené. Tin fortifikashon di e nèt di monopolio i oglipolionan indeseá i enfokamentu indeskriminá di e mekanismo di merkado liber kaminda esei riba término ta debilitá e servisio ku tin di wòrdu brindá. E kompetensia tantu den sektor di telekomunikashon komo esun di aviashon, riba término ta afektá invershon den infrastruktura teknológiko.
****
Mi ta bini bèk riba e tópiko aki den kurso di siman ku ta bini.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.