WILLEMSTAD – Ku introdukshon di e asina yamá ‘puntenrijbewijs’, tur outomobilista na Ulanda ta kore riesgo di pèrdè su reibeweis ora e pèrdè 3 di su sinku puntonan. Kada bia ku e outomobilista kometé un infrakshon e ta pèrdè 1 punto. Na e momentunan akí ta solamente esnan ku a kaba di haña nan reibeweis por a pèrdè punto.
Fiskal di tráfiko Koos Spee, di e departamentu di tráfiko di Ministerio Públiko (BVOM), a bisa ku e ‘puntenrijbewijs’, pa esnan ku a kaba di slag pa nan eksamen ta un éksito rotundo. E ta un ‘stok achter de deur’ i p’esei mester duna tur outomobilista un reibeweis asina. For di mart 2002 a introdusí e reibeweis di punto ku ta konosí tambe komo ‘beginnersrijbewijs’. Tur ulandes ku pa promé bia haña un reibeweis ta kai den e kategoria di ‘beginnende bestuurder’ i ta haña un reibeweis di punto durante 5 aña. Den e periodo akí e reglanan di tráfiko ta konta mas severo pa e persona akí. Kada un infrakshon ku e kometé e ta pèrdè 1 di e 5 puntonan ku e reibeweis tin. Ora e pèrdè e di 3 punto ta kita e reibeweis for di dje. E outomobilista mester someté su mes na un investigashon ku ta evaluá su habilidat di stür. Esaki ta konsistí di un parti teóriko i un parti práktiko. Si resultá ku e ‘outomobilista nobato’ no ta apto pa manehá un vehíkulo, e ta pèrdè su reibeweis di punto.
E infrakshonnan ku por pone un outomobilista nobato pèrdè su puntonan, ta ora e okashoná un aksidente serio ku frakturanan grave òf ku morto komo resultado, aksidentenan ku daño material òf fraktura, dor di no kumpli ku reglanan di tráfiko, infrakshonnan di ekseso di velosidat di mas ku 30 km/ora, kore muchu pegá riba e vehíkulo su dilanti i okashoná peliger òf molèster pa tráfiko.
Tòg sientífikonan ta pronostiká ku e kantidat di mortonan den tráfiko kasi lo no mengua. Nan ta kere ku e idea di un reibeweis di punto no ta spanta e outomobilista sufisiente. Solamente den kuminsamentu e outomobilistanan lo manehá ku mas koutela. Despues di un temporada nan ta kai bèk den nan patronchi bieu. Ta bin aserka ku un reibeweis di punto no ta evitá komportashon bobo tras di stür òf komportashon deskabeyá. Na fin di 2005 a sali na kla ku e chèns pa gara esnan kulpabel ta hopi chikí. Solamente 20 ‘pirata di kaminda’ a pèrdè nan reibeweis ku 3 punto di straf. Segun SWOV, e fundashon ku ta hasi investigashon di seguridat den tráfiko, e reibeweis di punto no ta alkansá su meta. Sin embargo otronan, manera BVOM, e departamentu di tráfiko di O.M., e resultadonan ta debidamente satisfaktorio i asta a yega e momentu pa amplia e reibeweis. Aparentemente 95% di esnan ku a haña un sentensia pa un infrakshon serio, no ta bini bèk un bia mas.
E motibu ku te na e momentunan akí no a hasi e reglanan mas severo, ta pasó tin miedu ku outomobilistanan ku pèrdè nan reibeweis ta bai manehá nan vehíkulo ilegal. Na Oustria e problema akí ta eksistí hopi tempu kaba. Tambe tin miedu ku mas outomobilista lo kore bai despues di un aksidente pa miedu di pèrdè un punto, e investigadónan ta kere. Loke si tin na Ulanda ta proposishonnan pa kita e reibeweis mas lihé ora ta trata di infrakshonnan di velosidat, bebementu i usamentu di droga tras di stür.
Tweede Kamer ku ta haña seguridat den tráfiko importante, a sòru pa no opstante e krítikanan di SWOV, tòg a introdusí e reibeweis. Ta bin aserka ku e sosten ta grandi: 85% di ulandesnan ta pro e reibeweis di punto segun enkuestanan. Es mas, sifranan di SWOV ta indiká ku e chèns ku outomobilistanan entre 18 i 24 aña di edat ta haña nan mes envolví den un aksidente, ta 4 bia mas grandi ku serka otro outomobilistanan.