Si mira e 6 proposicionnan y e invitacion pa reuni y delibera, hamas por cualifica cu ta gobierno ta terco
Gobierno di MEP cuestionando accion di sindicatonan

ORANJESTAD- “Nos ta bayendo di 4 siman di huelga, unda un lucha cu a aparenta di ta un lucha pa Indexering a bira uno cu ta pa baha gobierno. Desde comienso ora bo a mira cu ningun proposicion di gobierno no tabata ni ser trata den reunion general di cada sindicato den accion, tabata visto cu ta algo politico tabata andando. Realidad a mustra si cu tin sindicato tin miedo di tene reunion general, pasobra fuera cu hopi miembro no lo bin of esnan cu bin mes lo baha e directivanan cu ta hungando politica partidista.
Gobierno for di promer dia di huelga a expresa su disponibilidad pa compensa costo di bida, pasobra e opinion ta cu mester tene cuenta cu e interes general cu e prijs di bleki di salchicha cu a subi pa empleado publico tambe a subi pa e 42 mil empleadonan den sector priva. Gobierno a splica cada momento cu mester tene cuenta cu e aspecto di e situacion financiero precario. Ya for di e momento cu a sinta na mesa cu e sindicatonan di empleadonan publico, gobierno a manda un proposicion pa compensa costo di bida cu un suma igual pa tur ambtenaar di Af. 950,00.
Envez sindicatonan cu mester sa con pa delibera cu gobierno gara e Af. 950,00 cu dos man y bin mesa despues pa mira kico mas nan por saca, nan mucho tempran a recuri na huelga y awor ta bayendo sin rumbo pa stop locual nan mes a cuminsa cu un ‘draaiboek’ yena cu accionnan iresponsabel, manera sera Aeropuerto pa caba cu nos turismo etc. Hopi analista sindical a expresa cu politica a penetra completamente den e huelga, unda Mike Eman y Rudy Lampe a tuma rienda di e huelgistanan over. Visto tabata con AVP y RED a organiza e ocupacion ilegal di nos sala di Parlamento na un forma iresponsabel.
Gobierno a manda 6 proposicion caba y tur di inmediato a ser rechaza pa e grupo di Wolff, cu AVP, RED y MPA. A bin aserca un abogado di 20 voto ariba lista di OLA cu ta ataca gobernantenan y henter MEP personalmente y t’asina bao di nivel cu e mes mester tin verguenza di su actitud. Envez di actua como abogado e mes ta guia hunto cu Rudy Lampe y Mike Eman e proceso y hasta ta actua como vocero politico.
Gobierno buscando solucon a aumenta su proposicion cu 40%, unda a aumenta e Af. 950,00 di compensacion di 3 siman pasa te Af. 1344,00 plus ta paga locual falta di inhaalmanoeuvre di 1.2% y si sindicato kier drenta un structura di consulta por yega na 2% pa aña 2009, 2010 y 2011 bao di condicion cu pa yega na e ultimo aki e sindicatonan tambe mester haci sacrificio.
Hasta huez a bisa cu e proposicion di gobierno ta uno real y digno di un gobierno responsabel. Si bo mira e 6 proposicionnan di gobierno y e invitacion pa reuni y delibera, hamas por cualifica cu ta gobierno ta terco.
Ta un lastima cu gobierno a cuminza cu un proposicion di 10 miyon florin cu durante e intercambionan a aumenta esaki cu 40% te cu 17 miyon florin, unda despeus di esaki e sindicatonan ta haña placa pa nan miembronan, pero Conseho di Ministro mester bay corta drasticamente den nan ministerionan cu lo afecta e servicionan di gobierno.
Pregunta final di MEP ta, di con Mike Eman y Rudy Lampe cu nan titerenan den e sindicatonan kier mata e galiña cu ta pone webo di oro y caba cu nos economia?”