Skina di Sorti, awe djaluna 14 di aprel di 2008, ta kuminsá ku deseá un i tur un bon dia. Den asuntu di maneho, sigur ora ku bo ta den e fase di formulá alternativa, bo tin di evitá di kai den un dje trampanan mas grandi den proyektamentu di bo senarionan. Un di e fayonan tradishonal den seno di nos gobernashon ta e lokual nos ta yama “thinking things through” (profundidat den proyekshon di un proseso). E tendensia tei pa stòp na e promé kontratempu òf opta asina ku topa e promé benefisio. Nos ta midi nos mes un nanishi chikitu i nos no ta wak mas leu ku e nanishi ei.
****
E insistensia di Bestuurscollege den redukshon di impuesto pa kontrarestá oumento global den kosto di energia i komestibel, tantu polítikamente komo “bestuurlijk” no por ta otro ku “blindstaren” riba benefisio polítiko riba término korto. Ta kere di tene elektorado trankil i tal bes ta spera ku desaroyonan global lo kambia pa bon.
****
Un dje paradigmanan di maneho ta ku bo ta plania pa atendé ku e senario mas malu i ta spera pa lo mehor. Aparentemente nos gobernashon ta sigui ku su propio filosofia (erátiko) di tuma desishon basá riba lo mehor (speransa) i ta adoptá e ideologia dje abestrus pa e realidat (hinka kabes den santu pa no mira).
****
Laga mi mustra ta dikon e pretenshon di Bestuurscollege “bestuurlijk” ta karesé di sentido i te hasta ta iresponsabel. Si e desaroyo den kosto global ta unu di mas oumento (direkshon) i e dinámika por ta di kresementu aselerá i e dimenshon grandi (materia prima, finansa, logístika), e sorto di medida ku bo ta tuma ta esnan ku bo por ripití. Pues bo no ta reseta un remedi ku bo no por ripití ora e malesa ta unu ku ta produsí e mesun síntomanan. Bo tin di wak den direkshon di algu ku bo por keda ripití.
****
Bestuurscollege no por keda redusí su entradanan. E redukshonnan ku e ta proponé ta den e mesun filosofia di gobernashon dje debakel ku e fondo di energia. “Water naar zee dragen”. Na di dos lugá, bo no ta bai bini ku un medida ku benefisio general na momentu ku tin gruponan ku por apsorbé e oumentonan. Si forsa di kompra general ta baha, bo maneho mester keda segun e prinsipio di e skouder mas fuerte ku ta kontribuí ku esnan mas vulnerabel.
****
Na di tres lugá ta keda ku bo esfuerso mester keda bai den direkshon di krea alternativa stratégiko den sentido ku pa lokual ta energia bo tin ku invertí den fuentenan alternativo manera awa, solo i bientu (ku nos tin na abundansia) i pa lokual ta komestibel supsidiá (aki bo por wak e aspekto di impuesto) agrikultura, krio i peska pa redusí bo dependensia di eksterior.
****
Si gobernantenan a kana prediká aleluya en bes di hasi nan “huiswerk” na drechi, nan mester atmití nan eror i no trata di tapa un eror ku unu mas grandi ainda. Ku e filosofia di yega shelu sin muri, kosnan únikamente por bai di malu pa peor. E úniko mensahe korekto ta keda esun di “bloed, zweet en tranen”. Si no baha e nivel di bida, i traha duru ku futuro den mente, nos lo keda mendigá i hasi nos ridíkulo. Otro bia ta yega na e konklushon ku tin di bai Miraflores. Ridíkulo!!!!!!!!!!!!!!!!
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.