WILLEMSTAD - Djasabra 12 di aprel, Komité Olímpiko di Antia (NAOC) a yama un reunion ku e 6 federashonnan di deporte, ku ta riba e programa di Weganan di Reino 2009.
E evento aki lo tuma lugá na Aruba, den e periodo 25-31 di yüli 2009.
E reunion a tuma lugá den e oranan di mainta na e edifisio TDC di partner Olímpiko UTS na Jan Noorduynweg.
E seis (6) deportenan selektá tur tabata representá dor di 1 te hasta 3 representante. E deportenan ku a wòrdu anunsiá for di yanüari ta Futbòl, Beisbòl, Sòftbòl, Natashon (speed i sinkronisá), Taekwondo i Atletismo.
Di parti di NAOC tabata presente sra. Kathleen Anthony i Remco Tevreden.
Tevreden a duna un presentashon di Powerpoint, kaminda el a remarká ku tur edishonnan di Weganan di Reino ku el a eksperensiá, ni un biaha Antia a alkansá di kue puesto number 1 overall.
Mester rekonosé ku Antia tin sufisiente talento, pues e motibu di e hecho lamentabel aki tin ku wòrdu buská den otro área.
Aña pasá, kaminda NAOC tambe tabata enkargá ku tantu e preparashon komo e partisipashon di tur e atletanan, ya kaba NAOC a disidí di apliká un otro fórmula.
Fuera di hinka fondonan di NAOC su spònser nashonal i internashonal, NAOC tambe mes a hasi tèstnan di kondishon.
Esaki ta konosí aktualmente komo e famoso tèst di beep (shuttle run test).
Tevreden a duna un splikashon amplio kon e struktura di e Weganan di Reino ta hinka den otro for di 1995. Al kontrali na otro eventonan olímpiko, e evento Weganan di Reino ta un evento inisiá dor di polítikonan.
E Ministernan di Deporte tin e outoridat mas haltu pa ku e evento aki, kaminda nan a delegá e trabounan di maneho na e fundashon “Koninkrijksspelen Voor De Jeugd” òf Stuurgroep.
Miembro di NAOC, sr. Aubrey Sealy, ta representá deporte Antiano den e stuurgroep aki i sr. “Lipo” Elhage ta representá e Gobièrnu di Antia.
Mishon
E mishon ku stuurgroep tin deliniá den nan dokumento “Handvest” ta papia di dos punto.
E promé ta un sierto desaroyo di deporte na Aruba i Antia.
E segundo ta papia di interkambio di Kultura entre e hóbennan di edat 12-17 aña. NAOC ta bai enfoká hopi mas tantu riba e desaroyo di deporte riba mas tantu isla ku ta posibel.
Esaki ta nifiká ku lo invertí den no solamente atletanan, pero tambe den e dirigentenan i téknikonan. Ta p’ei NAOC for di awor aki a manda pidi tur e federashonnan 2 personanan di kontakto, pa asina tin siguransa di un kontinuidat.
Sr. Tevreden a menshoná último djasabra ku awe’n dia tur e komunikashonnan ta bai ku kòmpiuter i Internet.
Esaki ta rekerí ku tantu e delegadonan komo e coachnan tambe tin ku hasi esaki, pa sigui e desaroyonan internashonal.
Ya kaba direktiva di NAOC a duna di konosé pa tin e meta pa ofresé e lidernan selektá entre otro kursonan di kòmpiuter.
Planifikashon
E periodo di preparashon awor tin 14 luna. NAOC a parti esaki den dos, kaminda e promé periodo, sobrá di aña di 2008, ta bai enfoká huntu ku e federashonnan i islanan riba e maneho tékniko pa yega na e preselekshonnan.
E komunikashon ku tur isla lo kuminsá for di awor aki, hasiendo uso tambe di medionan di komunikashon moderno. Tevreden a trese dilanti ku por traha hopi mas efisiente i ekonómiko via Internet.
NAOC lo inisiá for di e aña aki reunionnan via Internet i Webcam.
Asin’aki por garantisá un mihó komunikashon ku ta tene e gastunan minimal.
Pa fin di e aña aki e meta ta pa kada federashon tin su preselekshon, ya den aña 2009 tin kasi 7 luna pa entrená e hóbennan un manera strukturá.
A klousurá e reunion ku e ponensia ku tur resultado deportivo, tin un relashon direkto ku e maneho ku a wòrdu hibá.
NAOC i e federashonnan ta bai planiá for di e momentu aki, pa asina por bisa otro aña na Aruba, ku tur hende a hasi nan máksimo esfuerso.
E reunion aki lo tuma lugá na St. Maarten tambe, den e último wikènt di aprel i despues riba e otro islanan. Despues tur aktor lo papia konhunto riba e maneho di kada deporte individual, pa asina traha riba e ehekushon.