Blackout0Prome resultado di acuerdo entre 

ORANJESTAD- Na 2005 e companianan di awa AQUALECTRA di Curaçao, W.E.B. Aruba N.V., WEB Bonaire N.V. y G.E.B.E. N.V. di St. Maarten a lanta e Plataforma di Awa Antia y Aruba of WNAA. Meta di e plataforma ta pa reforsa e lasonan y coperacion entre nan. E WNAA ta wordo dirigi pa un grupo piloto consistiendo di e directornan di e companianan di awa. Acopla na WNAA tin un cantidad di grupo di trabou bou cual tin: Seguridad, calidad di Awa, distribucion di Awa, Training, Comunicacion y Tecnologia di produccion di Awa.
Den cuadro di e importancia mas y mas creciente di e disponibilidad di suficiente awa di bebe puro den Mundo, e WNAA a disidi pa crea un “Caribbean Water Technology Research Institute” of CWTRI. E meta ta, mirando e experiencia di mas cu ochenta aña cu desalinacion di awa di lama pa produci awa di bebe na Antia, pa haci di e CWTRI un centro di conosimento di alta calidad pa e area di Caribe y resto di Mundo. Den e centro aki lo haci investigacion na nivel academico halto riba e tereno di produccion, distribucion y calidad di awa di bebe.
COOPERACION
Dia 14 di november 2007 den cuadro di e CWTRI, a firma un acuerdo di coperacion na Delft cu e “Technische Universiteit van Delft” (TU Delft), e “Vereniging van de waterbedrijven in Nederland” –VEWIN y e Universidad di Antia (UNA).
Na januari 2008 na Suriname e mesun acuerdo di coperacion aki a keda firma cu “N.V. Surinaamsche Waterleiding Maatschappij” (SWM). Ta e intencion cu den futuro sercano e Universidad Anton de Kom di Paramaribo tambe lo participa den e acuerdo aki.
Pa ehecuta e acuerdo aki tin actualmente tres cordinado esta ir. Filomeno A. Marchena pa e WNAA, Dr. ir. Jasper. Q.J.C. Verberk pa TU Delft y Mr. Ir. Richenel E. Bulbaai, MBA pa UNA. Dor di e coperacion aki e conosimento di e TU Delft riba tereno di produccion di awa di bebe, transporte y distribucion den su totalidad ta disponibel pa UNA, CWTRI y SWM. Pero tambe e conosimento particular y experiencia riba tereno di desalinacion di awa di lama di e companianan di Suriname, Aruba y Antia ta wordo comparti cu TU Delft.
INVESTIGACION
Riba 7 di april ultimo e prome investigacion di e CWTRI, esta: “Drinken van de Wind” a start, unda tres studiante den nan fase final di studio na TU Delft ta haci nan investigacion di practica na AQUALECTRA na Corsow. Aki nan lo envolvi studiante di UNA tambe. E proyecto aki ta ensera e produccion di awa di bebe dor di desalina awa di lama cu un instalacion di SWRO (Seawater Reverse Osmosis) pero cu ta traha pa medio di un molina di biento. E molina mecanicamente ta drai un pomp di presion halto pa e instalacion di SWRO. Asina no ta bay genera electricidad prome, pa e drai e pomp. E investigacion di practica ta dura te cu september 2008.
Como di dos actividad di e CWTRI lo tin un “gastcollege” na UNA den e periodo di 21 pa di 24 april 2008. Den esaki Dr. Ir. Jasper Q. J. C. Verberk y Ir. Filomeno A. (Boey) Marchena lo percura pa un cantidad di “colleges”. E colleges lo trata produccion di awa di bebe y tratamento di e awa di bebe. Sr. Verberk lo tuma pa su cuenta e parti di awa bou y riba tera y Sr. Marchena e parti di desalinacion di awa di lama pa produci awa dushi. E ultimo aki ta consisti di tres “colleges” di produccion di awa na W.E.B. Aruba N.V., e aspectonan teoretico y practico di e tecnologia thermico di evaporacion y e proceso di tuma desicion y construccion di e planta di awa di SWRO.