ORANJESTAD- Sindicato di maestronan di scol, SIMAR a emiti un comunicado di prensa ayera tardi, pa mantenE nan miembronan informa di ultimo desaroyonan, incluso e abuso di ayera tardi, ora cu for di oficina di Gobierno, un hende a tira un donderboos riba e manifestantenan.
“Cuater siman di speranza, pero tambe di angustia; di perseverancia y di inseguridad.
Trahadornan a pasa den expresionnan di solidarismo, di confrontacion, di compañarismo, di amistad y comprension pa otro, podiser trahadornan cu nan no tin contacto cu nan riba un base diario. Hopi ta cana rond cu sintimentonan di duda : ki dia e cos aki ta caba?
Trahadornan di Aruba tabata e blanco di intimidacion, di insulto, di engaño. Dialuna atardi trahadornan hasta a wordo bombardea cu donderboos, o algo pio, cu a wordo tira for di e oficina di bestuurskantoor. Danki Dios e señora a lanta for di e stul, pasobra esaki a keda na werki. Ta na unda nos ta bai ??? Ta asina grandi nan desesperacion ta ?
Ta tristo pa constata cu hasta ministernan a baha na e nivel aki, poniendo un banda e importancia di nan funcion y nan propio integridad.
Den e dianan aki Aruba ta pasando den un desaroyo grandi, pasobra hopi di nos a biba kico kier men valor y normanan, decencia, dignidad, respet propio y pa otro. Nos a biba e falta di sentido democratico di parti di gobernante y parlamentarionan. Pero tambe nos a worde confronta cu nos mes: kico ami mes ta para p’e? Mi ta dispuesto pa para hunto cu mi coleganan pa bringa pa logra un futuro mas sigur? Of mi ta scohe pa mi mes na prome lugar?
E imagennan di maestronan di scol cantando, tocando y bailando a bai rond mundo. Nan expresion creativo por a pone hopi pensa, cu e hendenan aki ta superficial, ta biba pa placer so. Pero den momentonan trankil, sinta hunto, nan ta expresa kico ta biba den nan curason. Nan preocupacion pa e alumnonan cu ta na nan encargo, nan preocupacionnan como mama, tata, partner. Nan inseguridad pa futuro cercano, ora tur cos cu por spera ta venganza.
Y apesar di tur esaki nan a keda para firme riba nan pia, pasobra nan ta convenci cu nan ta luchando pa un causa husto, pa algo cu nan tin derecho riba dje; pa respet y reconocemento di parti di gobernantenan y otro gremionan.
Lastimamente e apertura chikito, ora cu diabierna ultimo a sinta na mesa cu e organo di mas halto den nos sistema democratico, cu ta parlamento, no a cristaliza ainda. Dialuna e lidernan sindical a sinta casi ocho ora na mesa di negociacion cu gobierno, pero lamentabelmente gobierno a bandona mesa di negociacion. Gobierno su ultimo oferta tabata un pakete total cu ta ensera 100 florin den salario y 6 % di e 22 % di e añanan 2001 pa 2008, mara na e siguiente condicionnan: franchise pensioen, ta kita e non-actief for di payrol, kerntakenanalyse y performance management. E 6 % gobierno ta propone 2 % den e siguiente 3 aña. Sindicatonan a yega na 125 florin den salario y ta pidi pa e proximo 3 añanan 3,6% , pa yega na 10,8% di e 22%. Gobierno no kier a sigui negocia y a bandona mesa di negociacion y lidernan sindical a sali pafor pa informa e grupo grandi cu tabata warda pafor ansiosamente. E gritonan di rechazo pa e oferta di gobierno a resona y unanimamente a dicidi cu accionnan ta sigui y lo bira mas drastico.
Nos ta keda para firme y ta pidi tur cu no a uni su mes na e lucha ainda pa lanta para ! Union ta haci forsa.
Awe nos ta topa atrobe. Bin sin falta. Lo parti informacion tocante no work no pay y nos posicion huridico den esaki. No laga storianan cu ta bai rond intimidabo o kitabo di para pa e lucha aki cu ta di nos tur.”