WASHINGTON, Merka, - For di awe 15 di aprel, e kadenanan i “site” di Internet CNN.com lo reportá tokante reunionnan i aparishonnan públiko di e Pontífise durante su bishita na Merka.
Aktualmente tin 67 mion katóliko na Merka i mas ku un bion di katóliko na nivel mundial.
Pa e motibu aki, e kadenanan di CNN ta uni pa ofresé un siman di kobertura spesial di e promé bishita ofisial di Papa Benedicto VXI na Merka, kuminsando awe te djadumingu 20 di aprel.
CNNenEspañol, CNN International i CNN/USA lo reportá bibu direkto riba e seremonianan i eventonan, inkluyendo entre otro e reunion di Papa ku Presidente di Merka George W. Bush mañan for di Kas Blanku, i su diskurso na Nashonnan Uní djabièrnè awó.
E biahe aki na Merka ta representá e di seis bishita na un otro pais ku Papa Benedicto XVI ta realisá for di dia ku su papado a inisiá na 2005, i ta solamente e di dos bishita ku un Papa ta realisá na Kas Blanku.
E bishita, ademas, ta koinsidí ku 81 kumpleaño di e Pontífise mañan djarason 16 di aprel.
E ekipo di periodista di kadenanan CNNenEspañol, CNN/USA i CNN International for di studionan lo bai presentá insidentenan di yegada di Papa awe.
Durante awe i e dianan siguiente, e kadenanan lo konta ku aporte di periodistanan manera Juan Carlos López i Colleen McEdwards, reportando for di kapital merikano di Washington D.C., i Inés Ferré for di New York.
Igualmente, CNN International lo presentá reportahenan bibu, inkluyendo e santu sakrifisio di misa na Yankee Stadium.
Esnan ku tambe lo bai kontribuí dunando aporte importante den e kobertura spesial aki tin entre otro e analista di tema di Vatikano, John Allen, periodista Jim Acosta, presentadó di notisia Wolf Blitzer, Jason Carroll, Kyra Phillips, Richard Roth i Mary Snow.