WILLEMSTAD - Djasabra 12 di aprel den sala di eksibishon di International Trade Center (ITC) e Torneo Internashonal di Esgrima “Coupe Curaçao” a kontinuá ku su siguiente evento den e programa di promoshon di Esgrima. Tabata toka turno awor na esgrimistanan pa bringa riba e armanan di Florete Femenino i Sabel Maskulino.
Florete femenino
Komo ku a presentá solamente tres veterano femenino internashonal organisadónan a disidí di integrá e pul ku dos esgrimista kampion i sup kampion di Kòrsou i di Antia di edat mas hóben, pero sin ku nan lo risibí e premionan destiná pa e veteranonan.
E buèltanan klasifikatorio di Florete Femenino a produsí 4 semi finalista i e siguiente tabla di posishon 1. Ellen O’Leary (USA); 2. Patricia Lutton (USA); 3. Mieke de Graaf-Stoel (HOL); 4. Marivia Tuast (AHO); 5. Chantal Sprock (AHO).
A bringa e partido di eliminashon direkto entre Marivia Tuast (AHO) i Chantal Sprock (AHO) pa determiná ken ta klasifiká pa semi final. Tabata e kampion di Kòrsou i di Antia Marivia Tuast ku a gana e enkuentro ku skor di 10-3.
Den semi final Marivia Tuast mester a enfrentá Ellen O’Leary (USA) ku a mantené su mes na promé lugá riba tabla di posishon dor di gana di Marivia ku skor di 10-5.
E otro partido di semi final a bai entre Mieke de Graaf-Stoel (HOL) i Patricia Lutton di USA. Mieke de Graaf-Stoel e aktual kampion veterano di Ulanda riba Florete Femenino a bai e tempu kompleto di dos biaha 3 minüt pa gana e partido ku skor di 9-4.
E partido di final pues a bai entre Ellen O’Leary (USA) i Mieke de Graaf-Stoel (HOL). Mieke de Graaf a bin pa revanchá e derota di 5-4 den e buèlta di klasifikashon ku Mieke a risibí di e invikto Ellen O’Leary (USA).
Tur hende a kere ku Ellen O’Leary lo a mantené su invikto i ku e lo a bolbe gana di Mieke de GRAAF. E partido tabata di hopi tenshon.
Niun di e dos esgrimistanan no tabata kier a duna otro ganá.
Finalmente ku un viktoria di 10-7 Mieke de Graaf-Stoel (HOL) a gana e mundialista Ellen O’Leary (USA).
Despues di a risibí su Kopa Coupe CURACAO 2008 e Wilhelmus a zona pa e bunita logro di Mieke de Graaf-Stoel ku pa promé biaha despues di 35 aña tabata bèk na Kòrsou e isla kaminda el a biba shete aña durante di su hubentut.
E klasifikashon general final di florete femenino a bira: 1. Mieke de Graaf-Stoel (HOL); 2. Ellen O’Leary (USA); 3. Patricia Lutton (USA); Marivia Tuast (AHO); 5.Chantal Sprock (AHO)
Teniendo kuenta ku e kategoria di edat e medayanan pa Florete Femenino a keda repartí di siguiente manera
• Kategoria 60+: Ellen O’Leary (USA) - oro.
• Den kategoria 50-59 aña: Mieke de Graaf-Stoel (HOL) - oro; Patricia Lutton (USA) – plata