WILLEMSTAD – “Eks minister pa Asuntunan Interior di partido VVD Johan Remkes ta haña ku mester konsiderá seriamente pa Kòrsou i St. Maarten bandoná e idea pa bira un pais outónomo den Reino i drenta un mankomunidat ku Ulanda. Esei lo tin bentaha pa e islanan mes”, asina Remkes a bisa den un reakshon riba desaroyo di último simannan.
Remkes a bisa, ku a yega momentu pa evaluá e status aktual di Kòrsou i St. Maarten. “Ta bon pa kuminsá pensa riba alternativa”, asina el a bisa.
Tantu Kòrsou komo St. Maarten ta trahando awor aki pa bira un pais outónomo den Reino. “Te ainda” – di akuerdo ku diputado Zita Jesus-Leito – “e fecha pa logra esei ta keda 15 di desèmber 2008”.
Pero tin bastante difikultat den e kantidat di trabou ku ainda mester tuma lugá i konsekuentemente e fecha aki ta na duda. Ta papiando awor aki asta di 2010.
“Si e proseso no tin sufisiente progreso, si tin problema den e trayekto aki, anto Ulanda mester asumí su responsabilidat. Si ta nesesario, mi ta haña asta ku e mester intervení. Anto mester pensa kiko ta bai hasi,” Remkes a bisa.
Siman pasá tabatin e enkuentro entre sekretario di Estado Ank Bijleveld i parlamentu di Ulanda.
“Nos mester a komprondé di e mandatario ulandes, ku kosnan ta tardando. Ainda tin hopi problema pa solushoná. Nos ta skuchando ademas sonidonan ku ta bini tambe for di Antia ku no ta eksaktamente muestra di alegria,” asina Remkes a agregá.
Remkes a bisa, ku den un konstrukshon di mankomunidat, e islanan mes tin mas bentaha. Ta un hecho ku den un estado di mankomunidat, lo bo tin ménos metementu di Ulanda. Na momentu ku e islanan bira pais den Reino, ainda por tin hopi intervenshon di Ulanda, el a bisa.
Johan Remkes a bisa, ku e ta masha konsiente ku e islanan no ta sinta warda pa nan haña un status diferente ku loke nan ta luchando p’e awor aki. “Pero si tin tantu diskushon riba e aspekto finansiero, si tin tantu diskushon riba e asuntu di hustisia, lo ta rekomendabel pa nan pensa riba otro alternativanan. Den bida hopi biaha ta asuntu di hasi eskoho ku ta mas kumbiniente”, e eks minister a bisa.
Johan Remkes a bisa, ku e mes ta na fabor di un konstrukshon mas independiente posibel.
Remkes a anunsiá ku den e trayekto aki, mester tene kuenta si, ku mester adaptá tambe e status ku Aruba tin awor aki.
“Gelijke monniken, gelijke kappen,” el a enfatisá. Lo bira nesesario pa habri negosiashon di nobo ku e isla aki.
“Mi sa ku esaki lo no ta un trayekto fásil. Pero mi ta kere ku Aruba mester ta dispuesto tambe pa papia riba otro konstrukshon. E chèns ta grandi ku Aruba mes lo no tuma inisiativa den esaki, pero den e kaso mas ekstremo, Ulanda mes, mester kuminsá. Ulanda tin un responsabilidat grandi a base di Statüt. Ulanda no mester kore pa esei. Ulanda no mester basilá pa intervení,” Johan Remkes a opiná.