WILLEMSTAD - Hyatt Regency Hotel, e hotèl grandi di 350 kamber ku ta den konstrukshon na Sta. Barbara na e momentu aki, ta konfrontando un problema serio: e no por haña sufisiente hende kapasitá pa traha den e hotèl.
Esaki, di akuerdo ku un publikashon ku a sali den e edishon di awe di e korant ulandes De Telegraaf.
Hyatt Regency ta un dje kadenanan grandi ku ta den konstrukshon awor aki. Manera ta konosí, turismo tin algun aña kaba ku e ta kanando hopi bon i komo konsekuensia di esaki, tin un interes enorme pa sigui konstruí hotèl riba nos isla.
Renaissance Hotel, por ehèmpel, ta un dje hotèlnan grandi den konstrukshon na Rif ku ta spera di habri su portanan mas den kabamentu di e aña aki.
Pero tin mas hotèl den konstrukshon i tin hotèlnan eksistente ku ta ekspandiendo nan kantidat di kamber. Segun e korant NRC Next, ta konstruyendo hotèl na gran eskala awor aki na Kòrsou.
Kòrsou tin 137 mil habitante di kua 10 porshentu ta sin trabou di akuerdo ku e publikashon den e korant ulandes.
Gerente di proyekto di Hyatt ta hopi preokupá. El a bisa, ku pa loke ta trahadó pa konstrukshon, esei por a haña net-net ainda, pero pa loke ta personal ku mester bai traha den e hotèl mes, un total kalkulá di 800 hende, no por haña personal ku e kualifikashon nesesario, segun Reinen.
Aña pasá Kòrsou a konosé un kantidat di 650 mil turista. E intenshon ta pa oumentá e kantidat di kamber di 3000 ku e ta awor aki pa 7000 na aña 2011.
Segun Reinen, ta masha difísil pa haña partikularmente hóbennan interesá pa hasi e trabou aki. Desempleo bou di hubentut, segun e publikashon ta dramátiko: 37 porshentu.
Hayo Vinck, kende ta un persona ku ta duna formashon a hendenan desempleá pa nan bai traha den sektor di horeka, a bisa ku e ta enkontrando loke el a kalifiká komo “eksistensia di Kòrsou”.
El a mustra ku aparentemente ta konsiderá dunamentu di servisio komo algu inferior.
Ora e korant a puntr’é si esei kisas ta bon pa motibu di e pasado kolonial, Vinck a bisa ku e tambe a tende e argumento ei, pero ku e no por konfirmá esei.
Tur kos ta indiká, ku lo mester buska trahadó djafó, posiblemente di region, pa por kumpli ku e nesesidat di trahadó pa sektor di turismo.