Tráfiko di pasahero di mart 2008 tabata esun di mas haltu den historia 

WILLEMSTAD - Curaçao Airport Partners (CAP) a anunsiá, ku den luna di mart 2008, e kantidat di pasaheronan, tantu ku a yega komo pasaheronan i ku a sali for di Kòrsou, tabata esun di mas haltu (3.055). Esaki ta debí na e echo ku vuelonan di KLM pa Amsterdam tabata trese pasaheronan di tránsito for di Aruba i St. Maarten. Awor esaki no ta e kaso mas, pasó KLM ta bula direktamente pa Amsterdam.
Durante mart di 2008 pasaheronan ku ta yega a subi ku 40.35% i pasaheronan ku a sali a subi ku 38.26% kompará ku e mesun temporada di aña 2007. Un total di 57.914 pasahero a yega Kòrsou den mart 2008 i 56.914 pasahero a sali for di Kòrsou den mart 2008. CAP ta informá, ku 65% di e subida di pasaheronan ta atribuí na e merkado venesolano ku a oumentá su servisionan pa Kòrsou.
E merkadonan ku a konosé un subida den e kantidat di pasaheronan ku a sali for di Kòrsou ta inkluí Amsterdam 6% (2.483), Aruba 15% (2.039), Bogotá 66% (1.931), Boneiru 4% (790), Caracas 206% (10,737), Newark 12% (151), Las Piedras 139% (650), Maracaibo 265% (1.543), Montego Bay 47% (1.044), Miami 18% ( 3.001), Port of Spain 2% (84), St. Maarten 23% (1.502), Valencia 441% (11.360) i Toronto 6% (149).
Durante e promé kuartal di 2008 un total di 359.728 pasahero a pasa dor di aeropuerto Hato kompará ku 289.536 den e promé kuartal di 2007. Esaki ta representá un subida di 24%.
CAP ta apuntá aserka, ku e promé 3 lunanan di 2008 tabata asina faborabel debí na e echo ku Pasku di Resurekshon tabata tempran e aña aki.