WILLEMSTAD - Maduro & Curiel's Bank i Lito, e amiguitu spardó, ta sigui duna muchanan ku ta bishitá Skolnan Básiko (Skol di Fundeshi) oportunidat pa hasi algu bèk pa nan skol. Den kuadro di e proyekto di Lito “Kuida Bo skol i stima Bo skol”, muchanan ku ta bishitá klas 5 di tur Skol Básiko na Kòrsou por partisipá den e kompetensia di “Lesa pa Bo skol” i gana premio pa nan skol.
Na sèptèmber 2007 Lito a start ku su proyekto “Kuida Bo skol i stima Bo skol” ku e kompetensia di “Demostrá talento pa Bo skol”. Na novèmber Lito a sigui ku e kompetensia “Kore pa Bo skol” i na yanüari 2008, den temporada di karnaval tabata tin e kompetensia “Kanta Tumba pa Bo skol”.
Na luna di mei próksimo Sentro pa Guia Edukashonal ta organisá pa di 10 biaha nan “Voorleeswedstrijd” entre Skolnan Básiko. E “Voorleeswedstrijd” ta start dianan 7, 8 i 9 di mei i e gran final ta dia 31 di mei. Lito, e amiguitu Spardó, tambe ke yuda konsientisá muchanan di e importansia di lesamentu i pa e motibu aki a djòin Sentro di Guia Edukashonal i hasi e kompetensia aki parti di e proyekto “Kuida Bo skol i stima Bo skol”. Alabes Lito ta kontribuí ku su granito yuda nos muchanan stima tur loke ta di balor pa nan, pa nan famia, pa nan skol i pa Kòrsou. Komo apresio na e echo ku e muchanan ta kompetí pa nan skol, Lito ta pone disponibel premio pa e skolnan di e muchanan ku lesa i gana. Tur mucha ku pasa pa e fecha final lo risibí un gift cheque pa nan mes na balor di Naf. 75,-- i e mucha ku lesa mas mihó i sali number 1, su skol ta risibí un cheque na balor di Naf. 5.000,--. E mucha ku sali na di dos lugá su skol ta risibí un cheque na balor di Naf. 3.500,-- i e mucha ku sali na terser lugá su skol ta risibí un cheque na balor di Naf. 2.500,--. Aparte di e premionan pa esnan ku lesa mas mihó, tambe Lito lo duna e skol di e muchanan ku animá nan representante mas mihó pa via di un “yèll” riba e fecha final di e kompetensia ta risibí un cheque na balor di Naf. 1.000,--.
Maduro & Curiel's Bank i Lito ta pidi tur mucha pa kòrda lesa hopi i tambe kuida i stima tur loke ta di balor pa nan mes, nan famia, nan skol i Kòrsou.
Tambe Lito ta kòrda tur skol pa keda pendiente pa mas di e proyekto “Kuida Bo skol i stima Bo skol” ku ta duna muchanan di Skol Básiko oportunidat pa kompetí den diferente área di enseñansa, kultura i deporte i gana premio pa nan skol.