PHILADELPHIA, Pensilvania, Merka, - E krusial debate durante kua e kandidatonan pa nominashon presidensial demókrata, senador Hillary Clinton i senador Barack Obama, tabata dominá pa erornan ku ámbos a kometé den último lunanan.
Durante di e debate di ayera nochi, ku tabata un debate krusial pasobra ta esun último realisá promé ku e elekshonnan primario di estado di Pensilvania, a trata e relashon di Obama ku un kontrovertido pastor, tambe e vershon straño ku Hillary Clinton a bisa di un biahe na Bosnia.
E elekshonnan primario di e siman entrante lo por determiná si Clinton mester bandoná òf no su karera pa Presidensia di Merka.
Òf kisas, esun di ayera, por ta e último debate di e eks Promé Dama.
Tenshon
E tono general di e debate di ayera tabata tenso, ounke ámbos lider a koinsidí ku e merikanonan ke un kambio i nan a mustra konfiá ku kualke di nan dos lo por konfrontá kandidato republikano John McCain den e elekshonnan general di 4 di novèmber.
E promé 45 minüt di e debate tabata konsentrá den e erornan mas resiente di e kandidatonan.
Clinton a bolbe kritiká e komentario ku Obama a hasi resientemente, ku den tempu difísil e klase obrero ta pegá ku armanan i religion “pasobra nan ta amargá”.
Clinton a tacha e komentario komo “insultante” i Obama a defendé su mes dor di bisa ku a saka su komentario for di konteksto.
Obama a rekonosé ku el a eligí malu e palabranan, pero el a bisa ku Clinton ta “machiká” e asuntu lubidando ku e tambe a keda malinterpretá den pasado.
Di su banda, Clinton pa promé bia a pidi despensa pa a bisa ku durante su bishita na Bosnia na 1996, e mester a aterisá meimei di tirunan di frankotiradónan.
Poko despues a surgi un video di e evento, durante kua por mira Clinton yega trankilamente, kompañá pa su yu muhé Chelsea.
E eks Promé Dama a pidi despensa pa su melodramátiko vershon i a bisa ku e ta sinti su mes bèrgonsá.
“Vulnerabel”
Ku algun eksepshon, Obama no a ataká frontalmente su rival, loke por a duna un imágen di debilidat ku Clinton a probechá.
E dama senador pa New York a bisa ku Obama ta “demasiado vulnerabel” kontra McCain, ounke ora a puntr’é el a rekonosé ku Obama por gana i bira Presidente di Merka.
Pero tantu e abogado komo e eks Promé Dama a ninga bisa si lo pidi otro pa bira kompañero di fórmula. Nan ta konsiderá esaki “prematuro”.
Di tur manera, bentaha di e dama senador, kende tin mester di un viktoria sólido, a disminuí konsiderablemente.

Foto; Hillary Clinton Barack Obama 1704

Senador Hillary Clinton i senador Barack Obama partisipando na e debate presidensial na National Constitution Center ayera nochi.