AMSTERDAM – Ajax ketu bai por bira kampion di Ulanda. Di tur manera lo disidí riba e título di Eredivisie riba e último dia di e kampionato ulandes. Pa basta siman kaba tabata parse ku nada lo stroba PSV pa bira kampion un biaha mas, pero ayera Ajax a disidí ku e ta manten’é e preshon riba e ekipo di Eindhoven.
Ku un viktoria di 2-1 na Groningen ainda e titulo no ta definí. Ajax, faltando un wega mas pa hunga djadumingu awor, tin tres punto di diferensha riba PSV. PSV ku un empate djadumingu awor lo por disidí e título. Di otro banda si Ajax gana i PSV pèrdè lo por surgi un situashon masha interesante komo ku Ajax tin un mihó diferensha di gol.
Partido di ayera tabata kontinuashon di e partido di djadumingu den Euroborg ku KNVB a kanselá, despues ku fanátikonan a sende mas di 12 ròl di papel di wc na kandela.
Groningen a kuminsá e partido di ayera fuerte, pero mas e partido a avansá, mas Ajax a kuminsá dominá e wega. P’esei no ta straño ku Ajax a hinka e promé gol. Rasmus Lindgren ku Ajax por sierto a tuma for di Groningen a kòp e bala den gol. Nèt promé ku sosiegu, Matías Cahais e empatá e partido ku un kabesaso.
Den e di dos mitar, tur e dos ekiponan a trata di gana e partido. Groningen tabata serka di gol na momentu ku un kabesaso di Marnix Kolder a dal den lata. Pero tabata Ajax ku a hasi e wega 2-1 ku un gol di Luiz Suárez, irónikamente tambe un eks-FC Groningen. Ounke na e momentu ei Ajax por a bai traha mas riba su defensa, tabatin diferente chèns di FC Groningen pa empatá e partido. Finalmente e partido a bai kaba 2-1.
Di parti di Groningen nan no a duna masha balor na e resultado. Nan tabata mas dirigí riba éksito di e wega, despues di e insidentenan serio di djadumingu último. “E ambiente tabata fantástiko i tur hende a keda satisfecho”, asina direktor tékniko di Groningen Ron Jans a bisa. Direktor tékniko di Ajax Adrie Koster si tabatin interes enorme den e resultado. El a bisa, ku ainda Ajax lo por gana su promé título for di 2004. “Nos ta den kompetensia ainda i esei ta konta”, asina el a bisa.
Den e último wega di djadumingu, PSV lo topa Vitesse i mester di un punto pa yama su mes kampion. Ajax lo tuma Heracles den Arena. Mayoria analista ta kere ku PSV lo gana e título ounke mester bisa ku nan a bisa esei algun siman kaba.