ROMA – E landadó merikano, Michael Phelps, ganadó di ocho medaya olímpiko, na su 22 aña di edat, a rekonosé ku e trahenan di baño nobo di Speedo, a influensiá ku algun landadó por a kibra rèkòrtnan den último lunanan. “Nan a pèrmití di kita algun sentésimo di sekònde. No tin duda den esei, pero sin e trabou duru no ta sufisiente.”
Ku tur esei, Phelps no ta kere ku ta trata di un privilegio ku solamente algun landadó ta gosa di dje ya ku e trahe ta na disposishon di kualke ku ke us’é.
E Federashon Internashonal di Natashon (FINA) a konfirmá siman pasá ku e trahenan nobo di Speedo ta kumpli ku e normanan i a duna aprobashon pa wòrdu utilisá.
Tin un polémika aktualmente rondó di e trahenan ku ta wòrdu trahá di un material ku ta repelá e awa. Algun deportista i tékniko a reklamá ku esaki ta e motibu ku tantu rèkòrt asina a wòrdu kibrá últimamente.
Pa loke ta trata un bòikòt olímpiko, Phelps a limitá su mes bisando ku aki ta trata di un akontesimentu magnífiko. “Mundu ta reuní, e kombibensia na Vila Olímpiko ku atletanan di otro kultura. Mi no sa di bisa nada otro,” el a indiká.
En kuantu su forma, Phelps a bisa ku e ta sinti su mes mas relahá kompará ku promé ku Weganan Olímpiko 2004 na Atenas. “Mi sa kiko ta warda mi na Beijing i kon lo mi reakshoná i e atenshon ku mi ta haña serka prensa. Kiko e esfuersonan mester ta den pisina i e preshon.”
Su entrenadó, Bob Bowman a indiká ku e tin mas forsa físiko, e ta manehá su programa di kompetensia bon ku ta mas intenso i a mehorá su brasa hopi.
E lista definitivo di e pruebanan den kual Phelps lo bai kompetí den Weganan Olímpiko lo no wòrdu anunsiá te despues di e pruebanan na Merka.
“Nos lo opta pa e spesialidatnan den kual nos sa ku su posibilidatnan di gana ta mas haltu,” asina Phelph mes a bisa.