WILLEMSTAD - Trahadónan di Curaçao Port Services a reanudá trabou ayera, despues ku nan sindikato CBH OVP a yega na un entendimentu ku gerensia di CPS.
“E akuerdo ta enserá, ku gerensia ta drei bèk e desishon di a retené prima di AOV sin previo konsulta, pero e ta enserá di otro banda tambe ku e desishon di “no work, no pay” ta keda riba mesa. E sindikato, respetando e desishon aki, a palabrá ku en bes di kita plaka, lo kita un dia for di fakansi di e trahadónan”, asina Monique St. Jago, presidente di e sindikato CBH OVP a konfirmá.
Trahadónan di CPS a drenta akshon djamars mainta den forma di un reunion general bou di ora di trabou. E problema ta e hecho, ku prima di AOV a subi i sin konsultá promé, gerensia a kita e oumento aki for di salario di e trahadó.
E trahadónan a eksigí durante e reunion djamars mainta pa gerensia bin splika nan desishon, gerensia a mustra ku e ta dispuesto pa sinta ku un delegashon di trahadó, pero e trahadónan a keda para riba nan punto di bista.
Esei a pone ku no tabatin trabou djamars henter dia.
Den kurso di djamars anochi partidonan a haña otro, ora gerensia a disidí ku ta drei bèk e desishon ku el a tuma. A palabrá, ku pa mas tardá djabièrnè otro siman, lo depositá e plaka retené, bèk riba salario di e trahadónan. Pero a keda e punto di esun dia di trabou ku e trahadónan tabata den akshon.
“No work, no pay”, tabata desishon di gerensia, algu ku e sindikato no tabata di akuerdo kuné. Ayera mèrdia partidonan a sinta na mesa i a yega na un entendimentu riba e aspekto aki tambe. Sindikato a bai di akuerdo ku e desishon di “no work, no pay”.
“Nos a mustra gerensia, ku si nan a presentá djamars mainta den reunion di nos miembronan, kos lo tabata otro, di manera ku no mester a pèrdè un dia di trabou. Gerensia a mustra nos di su banda ku hecho ta, ku no tabatin trabou, pues pèrdida pa e kompania. Ademas, tabatin barku ku mester a desviá, pasobra nan no kier a warda mas tantu. Esei tambe ta pèrdida pa e kompania. Nos a mustra komprenshon pa esaki,” Monique St. Jago a splika.
“A palabrá si, ku no ta kita esun dia ku no a traha, fin di aprel. Palabrashon ta, ku e trahadó lo no sintié mesora den su saku, sino ora e ta bai ku fakansi. E lo tin un dia ménos di fakansi”, segun St. Jago a agregá.