WILLEMSTAD – “Awor ku servisio di pòst ta bèk den man di Gobièrnu Sentral, lo mester sinta analisá kon ta bai sigui manehá e kompania aki. En realidat tur opshon ta habri”, asina minister di Telekomunikashon ingeniero Maurice Adriaens a deklará ayera.
Pa algun aña, servisio di pòst tabata den man di Canadian Post International, ku a sera un kombenio komo partner stratégiko ku Antia pa manehá e servisio. Pero e situashon no a desaroyá den bon direkshon di manera ku Antia a eksigí pa haña e negoshi bèk.
Pero durante deliberashonnan pa haña servisio di pòst bèk, a surgi sierto komplikashon i reportadamente Canadian Post lo no tabata masha inkliná pa traspasá e montante ku a kumbiní di 13 mion.
Promé minister di Antia Emily de Jongh-Elhage a deklará ayera tardi, ku ofisialmente servisio di pòst ta den man di Gobièrnu Sentral atrobe.
E kanadesnan a kumpli tambe ku loke nan a primintí, esta traspaso di e montante di 13 mion florin.
E 13 mion florin aki, segun el a bisa, ta konsistí por parte di e suma di konseshon, e ta inkluí e montante ku Antia a negoshá pa haña e empresa bèk i vários otro komponente mas.
“Mi ta kontentu i orguyoso alabes di e tim ku a yuda gobièrnu negoshá e asuntu aki. Ta un grupo di profeshonal ku a hasi un tremendo trabou,” asina e promé minister a agregá.
Maurice Adriaens a bisa ku awor ku e organisashon ta bek den man di gobièrnu, mester bai weta kon ta e mihó forma pa maneh’é.
“Nos ta papiando di servisio di pòst, ku den e mundu di awendia ta konfrontando un situashon difísil, ku entrada di entre otro email. Hopi hende ta preferá di manda un mensahe atraves di e koreo elektróniko, na lugá di skibi karta”, segun e mandatario.
Adriaens a bisa, ku un buraku den merkado ta e hecho ku servisio di pòst por bai konsentrá riba transporte di pakete di un sitio pa otro. Esei kisas ta un pidi merkado ku e por hasi bon uso di dje, ela bisa.
Adriaens ta kere sinembargo ku mester analisá bon kon ta bai sigui ku pòst.
“Nos por sigui maneh’é nos mes, nos por buska un partner stratégiko.
Ademas, ku e kambionan estatal ku ta na kaminda, ta masha importante tambe determiná ki rumbo nos ta skohe. Nos por skohe pa parti e organisashon pa kada isla, nos por lag’é sigui funshoná tambe komo un organisashon sentral pa tur isla,” segun e minister.
El a bisa ku énfasis ku den konsulta ku eksperto i konseheronan di e islanan mes lo bai determiná futuro di e organisashon.