St. Maarten no ta aseptá pa bin kambionan djis pa sanea debe

WILLEMSTAD –Gobièrnu Sentral i Gobièrnu di Kòrsou tambe tin problema ku e Resolushon di Reino ku ta establesé Komishon di Supervishon Finansiero (CFT). “Spesífikamente e informashon ku CFT por pidi i e terminashon unilateral di e restrukturashon di debe,” asina Sarah Wescot-Williams a bisa durante un reunion di Konseho Insular na St. Maarten ayera indigná ainda ku Gobièrnu Sentral i Kòrsou ta tilda St. Maarten di tin e proseso di kambio Konstitushonal wantá.
Wescot-Williams a duna informashonnan detayá riba loke e Teritorionan Insular di Kòrsou i St. Maarten a akordá ku Ulanda den e área di ‘good corporate governance’, e manera kon kompanianan i fundashonnan di gobièrnu mester keda goberná.
E diputado di St. Maarten a bisa, ku ta kreando e impreshon eróneo ku St. Maarten ta tardando e inisio di e kanselashon di debe pa Gobièrnu Sentral i Kòrsou, pasobra St. Maarten tabata bèk riba akuerdonan riba implementashon di reglanan di bon gobernashon.
Wescot-Williams a mustra riba e hecho, ku vários polítiko di Ulanda, Kòrsou i Gobièrnu Sentral a akusá St. Maarten di ta bèk i tresiendo tardansa den e proseso.
“Sekretario di Estado ulandes, Ank Bijleveld-Schouten tambe a ekspresá su mal kontentu ku St. Maarten ta bèk awor riba asuntunan di NV nan di Gobièrnu.”
Diputado di Finansa di Kòrsou, Mike Willem tambe a bisa, ku e saneamentu di debe ta pega pa motibu di St. Maarten. Wescot-Williams ta kere, ku awor si ta tempu pa esnan ku ta representá e entidatnan den e komishonnan tékniko presentá e status di e asuntunan i pone esaki riba mesa pa tur hende por mira unda kosnan ta aktualmente.
Komokiera ku no tin ningun akuerdo riba regulashonnan di NV nan di Gobièrnu komo parti di e tarea di supervishon finansiero, pero si tin un akuerdo entre partidonan pa regulá NV nan mes, asina e mester ta pa St. Maarten, segun Wescot-Williams.
“Corporate Governance a wòrdu lagá for di e resolushon di supervishon finansiero durante e konsulta polítiko dia 22 di yanüari. A hasi algun menshon di asuntunan chikitu ku mester keda regulá i kiko mester sosodé si esaki no tuma lugá,” asina el a sigui bisa.
“Miéntras ku e parameter nan di CFT a keda establesé den a akuerdo di 2 di novèmber 2006, e formalisashon di CFT mester a keda hasí pa via di un Resolushon di Reino. Ta den e proseso aki ku St. Maarten kada bes mester a pone hopi atenshon pa no ekspandé e ròl di CFT pa inkluí asuntunan ku no tabatin akuerdo riba nan. St. Maarten ta rechasá, ku partidonan unilateralmente ke desviá for di e akuerdo anterior. E saneamentu di debe ta un método, pero no e final i nos ta rechasá pa aseptá kiko ku bini pa saneamentu di e debe bira realidat,” asina e diputado di Asuntunan Konstitushonal di St. Maarten a finalisá bisando.