ORANJESTAD- Un recordatorii ta bai na tur instancia y persona cu dialuna 21 di april, lo ta e ultimo dia pa por entrega nominadonan pa Copa Hubenil Gobernador Felipe B. Tromp.
E ganador di e copa lo ricibi e premio dia 30 di april, Aña di La Reina, for di man di Gobernador Fredis Refunjol. Tambe lo tin dos premio di estimulo.
Pa bin na remarke pa gana e copa e nominado of nominadonan no mag tin mas cu 18 aña y mester entrega un descripcion detaya di e logronan durante e ultimo aña, esta for di 30 di april 2007 te cu 31 di maart 2008.
E logronan por ta ariba tereno deportivo, social, cultural y primeramente mester trata di logronan local. Den caso di un grupo hubenil, anto e miembronan no mag tin mas cu 18 aña, apesar cu e lidernan si por ta hendenan adulto.
Na Aruba tin hopi trabou bunita ta tumando lugar na bienestar di nos hobennan, pero no ta tur ta haya suficiente reconocimento. Specialmente den e temponan dificil aki, unda nos hobennan hopi biaha ta bira victima di violencia, drogadiccion, criminalidad etc. nos mester por reconoce e trabou cu hopi lidernan boluntario ta haci pa guia nos hobennan manera den scouting, parti spiritual, musica, teatro, baile, deporte etc.
Tambe mester reconoce e propio esfuersonan di e hobennan cu ta dedica nan tempo liber na deporte, baile, arte, musica, trabou social, educativo y pastoral. Sin duda cu e apoyo di mayornan ta indispensabel pa nos hobennan por dedica algo di nan tempo na nan desaroyo personal.
Un bes mas ta pidi esnan cu ta traha cu hobennan pa entrega nominadonan pa Copa Hubenil Gobernador Felipe B. Tromp pa mas tarda dialuna 21 di april 2008 na señora Nilda Koolman, Zoutmanstraat 1.