PHILADELPHIA – Resientemente e gerente general di Houston Astros, Ed Wade a keda informá, ku Miguel Tejada tin mas edat ku loke e tin. Tejada a nase dia 25 di mei 1974 i no 25 di mei 1976 manera ta pará den e “media guide”. E shortstop tin 33 aña rumbo pa 34.
“Durante di entrevista ku prensa a bin sali na kla, ku T ku e edat ku nos tin di Tejada, no ta korekto”, asina Wade a bisa. “Su greencard, su reibeweis, tur kos ku e ta usa personalmente tin pará ku el a nase na 1974. Den e “media guide” tin pará ku el a nase na 1976. Nos a bisa Miguel ku nos lo bai trese kambio den esaki. Pero e kos ta, ku e ta hungando manera un hóben di 25 aña”.
Wade i Tejada a bini dilanti ku e revelashon aki despues ku nan a bin haña sa, ku ESPN tin informashon di e edat aktual di Tejada.
Di akuerdo ku un reportahe riba ESPN.com di e korespondiente Tom Farrey su kolumna “E:60”, durante di un entrevista ku Tejada na Citizens Bank Park, esaki a mustra Tejada un kopia di un papel di nasementu ku su tata a entregá na Bani, Repúblika Dominikana ku ta mustra ku Tejada a nase na 1974.
E dokumento, di akuerdo ku ESPN.com a keda a atkerí dor di un kantor di abogado ku a keda kontratá dor di ESPN despues ku trahadónan na Kranshi na Bani a bisa ku e informashonnan ei ta konfidensial.
“E:60” ta un programa investigativo di un ora na ESPN, ku ta planiá di pasa un programa riba Tejada dia 22 di aprel.
Durante di e entrevista ku Tejada, Farrey ta puntra Tejada kuantu aña e tin i esaki ta kontestá 32 aña. Farrey e ora ei ta mustra Tejada kopia di e papel di nasementu i ta puntr’é si esaki ta esun bon. Tejada a bisa ku probablemente i mesora a tèrminá e entrevista, bisando ku ta algu personal.
Tejada originalmente a keda firmá dor di Juan Marichal, scout di Oakland Atletics dia 17 di yüli 1993, na edat di 17 aña.
Awor tur kos ta mustra ku Tejada tabatin 19 aña. Tejada a debutá den Liga Grandi na 1997.
E rason di Tejada riba e diskrepansia aki tabata unu simpel.
“Mi tabata un mucha hòmber pober”, asina Tejada a bisa. “Mi tabata kier a firma un kontrakt profeshonal i esei tabata e úniko manera pa hasié. Mi no tabata kier i no hasi nada malu. Na e momentunan ei mi tabatin dos aña mas bieu”.
Wade a papia ku Tejada i a resolvé e tópiko aki.