Lechi di Mama e úniko base korekto pa desaroyo di yu 

WILLEMSTAD – E minister di Salú Públiko na Ulanda Ab Klink a haña hopi publisidat e siman aki ku su idea pa establesé pa lei ku tur mama mester duna lechi di pechu durante 6 luna largu. E mandatario ulandes ta di opinion, ku konsiderando ku lechi di mama ta e mihó protekshon pa un yu i ku mester obligá mayornan pa hasi esaki tambe. Lechi di mama ta e úniko alimento natural ku ta kontené e protekshonnan pa e yu kontra di diarea, alergia i infekshonnan di pulmon i kanal di urina. Otro bentahanan di dunamentu di lechi di mama ta ku e ta fortifiká konfiansa di e mucha den su mes, e ta forma un bon laso i protekshon entre mama i yu i e ta mas barata, pasobra no mester kumpra lechi pa e yu. Pa e hende muhé mes dunamentu di lechi di pechu su bentaha ta ku su riesgo riba kanser na pechu promé ku su menopousa ta mas chikitu i e ta protehá kontra di biramentu bros di wesunan di e hende muhé despues di menopousa. Na Ulanda 80% di mamanan ku ta duna lus ta kuminsá na duna lechi di mama. Despues tin 54% di yunan ku nase ku ta haña un luna di lechi di pechu. I entre 20 pa 25% ta sigui haña seis luna largu.

Kon e situashon ta na Kòrsou?

E situashon na Kòrsou ta ku kasi tur mama ku duna lusa na hospitalnan òf den klínika maternal ta haña apoyo i sosten pa duna lechi di mama. Pero ora ku nan bai kas i ku nan no tin e sosten profeshonal ta keda solamente 12 pa 13% di yu ku ta keda haña lechi di mama seis luna òf mas. Esaki segun informashonnan di Fundashon Lechi di Mama Kòrsou. E fundashon ku a lanta na 1981 konstantemente a duna informashon i guia na profeshonalnan ku ta traha ku mamanan i nan yunan resien nasí i tambe na mamanan mes pa asina ei konsientisá di kon ta importante pa komunidat kompleto pa duna yunan lechi di mama. Fundashon Lechi di Mama Kòrsou tambe a organisá diferente aktividat pa duna informashon i a hasi esaki invitando tambe profeshonalnan i organisashonnan internashonal pa a bin Kòrsou bin duna informashon.
Martha Betrian Wansing tabata 14 aña largu presidente di Fundashon Lechi di Mama Kòrsou. Komo persona aktivo ainda den direktiva di Fundashon Lechi di Mama Kòrsou e ta di opinion ku ta interesante pa nota atrobe ku e proposishon ulandes kon kada biaha atrobe ta keda bini dilanti internashonalmente kon importante dunamentu di lechi di mama ta. ‘Lechi di mama su benefisionan ta aseptá i rekonosé sientifikamente i pa tur hende ku sa mihó, pero tòg ta logra na usa duda di mamanan resien pa nan duna nan yunan lechi di bleki. Ke men ta bon si na Ulanda awor nan ta bin ku e proposishon aki i ta di wak si e ta logra”, asina Martha Betrian Wansing a sigui bisa.
Sra. Betrian Wansing a bisa tambe, ku kisas nos na Kòrsou por tuma e ehèmpel ei, pasobra ta tristu pa mira kon hende ku por, ta ninga nan yu e mihó alimento.
Fundashon Lechi di Mama Kòrsou a firma durante di su añanan di eksistensia diferente akuerdo di intenshon (Letters of Intent) ku ministernan di Salú Públiko antiano na turno. Te ainda no sali nada afó. Minister antiano enkargá ku Salú Públiko Omayra Leeflang riba e pregunta di kiko e ta pensa di un lei pa obligá dunamentu di lechi di mama a bisa ku e ta pa kompletamente tras di e ponensia ku lechi di mama mester ta e promé alimento pa nutri nos yunan. E mandatario a sostené ku mester keda duna informashon kontinuamente pa konsientisá tantu mama komo tatanan hóben riba importansia pa salú di nan yu i sigur den e tempu aki kon nan por baha gastu ku lechi di mama. “Bon mirá mester konsientisá komunidat kompleto”, asina minister Leeflang a finalisá bisando.
E proposishon di lei na Ulanda ta interesante, pasobra Ulanda ta un pais kaminda tin masha atenshon pa parto natural. I 30% di hende muhé ta duna lus na kas. Pero tòg no ta duna alimento ku lechi di mama atenshon. UNICEF resientemente a lamentá ku e sifra di dunamentu di lechi di pechu na Ulanda ta ekstremadamente abou. Segun e organisashon ta e echo ku esnan ku mester duna e kuido na Ulanda na mamanan ku yunan resien nasí no tin e informashonnan korekto pa por duna e guia korekto pa duna lechi di pechu mas tantu posibel.