Mayornan mester bira mas mayor i karga nan responsabilidat!

WILLEMSTAD – Sitek ta kere, ku mayornan mester stòp di pone karga riba nan yunan, ya ku esaki ta hasi ku nan no por funshoná debidamente na skol. Tin muchu problemanan na kas ku mayornan ta laga riba nan yunan ku ta hasi ku nan ta bira agresivo. Den kombersashon ku presidente di Sitek, Bicho Justiana ta opiná, ku mayornan no ta preokupá awendia si nan yunan ta tene relashon seksual si òf no. Tampoko no ta tene kuenta ku nan yunan ku ta keda den sentro di siudat te 7’or di anochi den nan unifòrm di skol. Despues ku outoridatnan a bisa ku nan lo kore ku tur mucha ku tin unifòrm di skol, ta hasi ku e yunan ta hinka t-shirt den nan tas i kambia esaki, di manera ku no por kore ku nan for di kaya.
Sitek ta kere, ku e muchanan lo por dibertí, pero e forma ku e muchanan ke dibertí ta unu for di regla. Mayornan na momentu ku polisnan intervení, semper ta lanta kontra outoridatnan. P’esei awe tin muchanan ku nan 32 aña ya ta wela, ku sigur ta apsurdo pa ku e edat aki tin hende ku ta wela. E mesun situashon aki ta bira un sirkulo visioso den famia, pa despues tin ku kritiká gobièrnu, polis, komunidat, en bes di asumí nan responsabilidat.
Na vários okashon tin diskushon riba e konsepto spiritual i ku ta basa esaki ku regla. Segun Justiana, regla mester ta algu for di kas, ya ku no t’asina ku misa ta pone regla. Meskos ku ora ta trata di regla, hopi ta konsiderá e reglanan aki komo ‘chapo’. Den misa nunka tin regla, pero bèrdat ta, ku mester duna muchanan formashon. Tin hopi ta kere, ku ora bo ta den misa tambe e reglanan ku mester biba kuné ta ‘chapo’, ya ku e muchanan ke biba ku pensamentu liberal. Tambe mester kaba ku e pensamentunan anarkista i kuminsá komportá nan mes ku rèspèt.
Sitek ta opiná, ku muchanan mester kuminsá respetá nan kurpa i respetá otro hende. Mester forma e muchanan pa kuminsá respetá esnan ku ta kuida nan, polis, komunidat i ku mayornan mester bira mas mayor. Na e momentunan aki tin hopi gang ta enfrentá otro den pelea i tambe alumnonan ku ta presentá na skol ku armanan blanku. Tin kasonan kaminda skolnan a manda yama mayornan, nan ta presentá ku un aktitut pió ku nan propio yunan. Meskos ku tin kasonan ku polisnan mester a akudí na skolnan pa duna asistensia, ya ku komportashon di e mayornan tabata fatal.
Sitek ta mustra, ku en bes ku intervenshon di outoridat ta ser pidí pa alumnonan, esaki ta bòltu bira pa e mayornan, ya ku ta e mayornan mester pone òrdu riba nan. Mayornan mester asumí nan responsabilidat riba nan yunan i stòp di laga esaki pa e komunidat. No ta e dosente so tin di duna e alumno kuido, pero esaki mester kuminsá for di kas. Si e alumnonan ta haña un formashon responsabel ta evitá ku tin muchanan ònbeskòp ta lanta. Mayornan mester bira ta koregí e fayonan di nan yunan mas tantu ainda.
Tin hopi kas kaminda mayornan mes ta bisa e yunan ku niun hende tin kos di bisa nan. Mester kuminsá wak tur e hendenan hòmber ku ta traha yu pa loko, keriendo ku esaki ta algu di machu. Sitek ta mustra, ku mester kuminsá obligá e hende muhé pa bisa nòmber di e tata na momentu ku ta buska yudansa na sierto ofisinanan di gobièrnu, pa por lokalisá esakinan pa kria nan yunan. Tin hopi mucha muhé ta bai buska nan PP-Kaart sin por bisa ken ta e tata di yunan. Sitek ta boga pa introdusí un forma di sanshon pa e falta di responsabilidat aki.
Mester bini un fórmula pa kria yunan, mester tin tur datonan i ku e tata lo keda pèrsigui pa kria e yunan, segun Sitek ta duna di konosé.