Prof. Dr. Lorito, katedrátiko emeritus di informashon relativo ta yama tur hende un felis djabièrnè. Siman a bolbe pasa lihé. Ta kon ta hasi?
****
Tur kaminda ta komentá kon Nini a atendé ku e invershonistanan di Renaissance. Nos tambe ta kere ku su tirada den nan direkshon no tabata korekto. Nos ta respetá e opinion di Nini pa tin un otro pensamentu riba desaroyo di e área di Rif. Pero ora bo tin ku defendé un proyekto (ku niun hende no sa di dje), anto bo no tin ku skòp kontra esnan ku tei kaba i a demostrá ku nan por i ku nan mes sèn.
****
Tin algun kos inkorekto tambe ku nos ta kere ku Nini mester rektifiká. Un di nan ta kaminda el a bisa ku e invershonistanan ta bendiendo e hotèl. Esei sigur no ta korekto. Pa un mandatario bisa un kos asina, esei sigur no ta na su lugá. Ademas e asuntu di “kue” un plan di DROV tambe no ta korekto. E invershonistanan a haña partisipashon den e proseso komo “stakeholder”. Ku otro palabra no ta via di porta patras nan a drenta “kue” nada, pero nan tabata partisipante den e deliberashonnan.
****
Por lo demas, nos ta laga e situashon pa Nini i su koleganan tuma e desishon ku nan ta konsiderá mas korekto. E úniko kos ku nos kier a hasi ta koregí algun ekspreshon inkorekto den e kaso aki. Nos ta spera ku sano huisio lo prevalesé i ku lo tuma e desishon mas korekto i ku ta sirbi interes general mas mihó.
****
Nos a tende e deklarashonnan ku Papa Benedikto 16 a hasi ayera na Merka. Nan a zona meskos ku un konseho di voto pa Barack Obama. E pontífise a bisa latinonan i hendenan di koló ku mihó tempu ta nan dilanti den e pais di oportunidat ku yama Merka. Papa a zona hopi “Obamaísta”.
****
Por sierto ku e asuntu di pastornan ku a molestiá muchanan na Merka a haña masha atenshon durante e bishita di Papa. E revelashonnan a kosta Iglesia Katóliko masha sèn ku areglonan pafó di Korte i daño i perhuisio. Papa a pidi pordon i mas pordon.
****
Nos a spera ku e siman aki durante su presentashon na prensa, nos Obispu tambe lo a pidi pordon pa e religiosonan ku a hasi nan mes kulpabel na e mesun aktonan den nos diósesis. Esmas, nos tin impreshon fuerte ku algun di nan a haña yudansa di Iglesia pa nan skapa nan kara i di Iglesia. Ken ta kòrda e kaso na Islariba, na Wishi òf esun di Montaña?
****
Por ta awor ku ta selebrá 50 aña di Obispado ta un bon idea pa no solamente mustra riba e kosnan bon ku Obispado a nifiká pa nos komunidat pero tambe asumí responsabilidat pa e kasonan kaminda klero no a komportá manera ta eksigí di un disípulo di Señor. Ta di mas pidi?
****
Awe mainta nos a yama Konseho di Minister i un dama a kontestá manera ta na kas e ta. Nos kier pa tur hende ku ta sirbi na Gobièrnu, NV-nan òf Fundashonnan di Gobièrnu pa nan tene kuenta ku nan no ta na kas. Pa e dama siña un poko, Lorito a formulá kon e mester hisa telefòn: “Bondia, ta ku Konseho di Minister. Ku kiko mi por yuda?”
****
Nos ta bai keda te aki awe. Aliansa Patriótiko a manda algun pòrtrèt pa demostrá nos ku tabatin hopi hende na nan salida. Nos a konta 17. Por ta nos a konta malu!
****
Un saludo na Aqualectra i BOO pa nan regulá inesperá ayera nochi pa koriente a bai atrobe pa algun ora anto den mardugá. Avisá nos otro biaha mas tempran, ya nos ta pidi e sanguranan pa muda! Te mañan ku Dios su poder!