WILLEMSTAD – Minister di Asuntunan Ekonómiko i di Labor Elvis Tjin A Sjoe a bisa LA PRENSA awe mainta ku e lo ta pará den e promé rei pa defendé e desishon pa duna dia 2 di mei awor liber. “E desishon ta hustifiká”, asina e minister a bisa.
LA PRENSA a informá riba nos portada awe ku e desishon no a kumpli ku e rekisitonan konstitushonal. Ta awor numa, despues di e anunsio, a pidi SER i Raad van Advies pa duna nan opinion riba e desishon.
Minister Tjin A Sjoe a deklará awe mainta pa LA PRENSA ku lei aktual ta bisa ku si Dia di Labor ta kai riba djadumingu, e dia siguiente ta duna liber. Si dia promé di mei ta kai riba un otro dia, manera den e kaso di Asuncion, lei no ta duna espasio pa esei. P’esei a hasi un kambio den lei. Pero pa hasi e kambio aki, tempu ta muchu kòrtiku. P’esei a pasa e desishon i e teksto di e aviso den prensa den Konseho di Minister pendiente e proseso ku mester tuma lugá. E teksto den korant ta papia di pendiente aprobashon di e kambio.
E minister a bisa ku e no ta masha kontentu ku den promé instansha VBC a pidi pa anunsiá e kambio mas tempran posibel pa sektor privá por tene kuenta ku e desishon. Awor ku a anunsiá e desishon, Gobièrnu di Antia a haña un karta ku ta papia di un desishon ku ta mas bien oportunista (“gelegenheidswetgeving). Segun VBC, e tipo di desishonnan aki ta kosta komersio hopi plaka. “Mi ta kere ku tin hende tin derechi pa haña e dia aki liber. Ta un selebrashon internashonal. Na Bèlgika nan a usa e mesun konstrukshon. Nos no a hasi nada straño i nos no por kere ku tin hende kontra”, asina el a bisa.
Pa loke ta trata e ponensia ku a pone e órganonan di konseho dilanti un desishon ku no por kambia mas, e minister a rekòrdá ku manera e palabra mes a bisa ta konseho nan ta duna. “Finalmente ta Gobièrnu ta disidí. No por ta posibel ku un órgano di konseho ta imponé su desishon riba Gobièrnu ku ta esun ku ta karga responsabilidat pa tur desishon. Ademas, sektor privá no mester mir’é komo un desishon oportunista pasobra ta un kos ku ta pasa kada 100 aña. Lo mi ta promé den rei pa defendé e desishon aki. Nos maneho ta pa no mishi ku sektor privá, pa laga e sektor regulá su mes mas tantu posibel a base di e prinsipio di merkado liber. Pero Gobièrnu tin su responsabilidat. Despues di tur e diskushonnan ku a lanta kabes mi ta kontentu ku ta te aki 100 aña tin e situashon aki atrobe”, asina e minister a suspirá.
Den un karta di e minister pa SER di kua LA PRENSA tin un kopia, e minister ta bisa ku no tabata su intenshon pa no skucha SER i Raad van Advies. E ta bisa ku e preshon di tempu a pone ku kosnan a bai asina aki e biaha aki i ku mester a informá komunidat promé ku e konsehonan a drenta. “Mi ta garantisá ku den futuro lo mi hasi mi máksimo pa evitá ripitishon”, asina e minister a bisa.