WILLEMSTAD – Gobièrnu di Antia a pega un barku formal, awor ku el a anunsiá ofisialmente, ku dia 2 di mei ta liber, pero no a sigui e prosedura korekto. No a skucha opinion di Konseho Soshal-ekonómiko (SER) ni Raad van Advies riba e asuntu aki manera Staatsregeling (nos konstitushon ta bisa). Minister di Asuntunan Ekonómiko i Labor Elvis Tjin A Sjoe (UPB) despues di a haña konseho di su Direktorado di Labor, a bai Konseho di Minister ku e proposishon pa duna dia 2 di mei liber. El a haña sosten kompleto di gabinete pa e desishon. Inkluso e aviso ku ta saliendo den e dianan aki pa anunsiá e desishon, a haña aprobashon unánime di Konseho di Minister. Algun minister (di Kòrsou) awor a ekspresá duda, prinsipalmente pa motibu di e prosedura ku a sigui. Un karta fuerte di VBC den direkshon di gobièrnu a añadí na e duda aki.
Miéntras tantu, awe mainta SER a tene un seshon urgente pa wak si ainda e por duna un opinion riba e desishon. Pero den seno di e organisashon nan ta malkontentu ku e prosedura ku a sigui. Es mas, si nan no duna aprobashon na e desishon di e minister, loke ta un opshon, lo por krea e impreshon ku ta SER ta kontra di un dia liber pa komunidat. Di otro banda, Raad van Advies tambe a haña un karta di e minister pa koregí e situashon, pero Raad van Advies si no ta reuní awor aki, pero te dia 5 di mei awor.
LA PRENSA a informá ku karakter di primisia, ku Gobièrnu di Antia lo duna dia 2 di mei liber komo kompensashon pa e hecho, ku dia 1 di mei ta kai riba Asuncion ku ta un dia liber kaba. Den pasado tabatin un regla ku ta bisa, ku ora Dia di Trabou ta kai riba un dia ofisialmente liber, ta duna liber e siguiente dia. E último biaha ku esei a pasa pa loke ta Dia di Trabou tabata na 1913.
Remarkabel ta, ku den e kaso aki ku ya kaba e minister a saka diferente aviso den korant splikando ku dia 2 di mei ta liber. Diferente doño di trabou ya kaba a anunsiá nan trahadónan ku ta liber dia 2 di mei i pa empresanan ku ta hasi trabou kontinuo (manera den turismo, kompanianan di utilidat i otronan) ya kaba a kuminsá ku ahuste di skèdjelnan di trabou. Awor ta resultá, ku e minister tabata prematuro den su anunsio. Presidente di SER, Stanley Betrian a konfirmá awe mainta, ku ta awor numa nan a haña e petishon pa trata e dia liber, pues despues ku a anunsiá e desishon. A base di esei a tene un reunion awe di SER pa diskutí e proposishon. E konklushon di SER ta sekreto. Betrian a bisa ku en bèrdat gobièrnu a pone SER dilanti di un “fait accompli” ku e anunsio. Betrian a bisa si, ku SER tin su mes outoridat den e kaso aki i ta posibel ku e organisashon ta yega na e konklushon ku no por sostené e desishon. SER ta formá pa representantenan di doñonan di trabou, representantenan di trahadó i hendenan den trayektoria den komunidat.
Un bosero di e otro instansia di Konseho Raad van Advies a bisa LA PRENSA awe mainta, ku loke ta pasando no ta konforme e prosedura normal pa e tipo di kasonan aki. Raad van Advies no a haña e “Landsbesluit” di e minister pa atendé. E proseso di un “Landsbesluit” ta kana via di gobernador ku ta pidi Raad van State duna su opinion. Esei no a pasa den e kaso aki. Por lo tantu Raad van Advies no por duna un opinion riba un “Landsbesluit” ku e no a haña. E bosero no kier a duna un opinion riba kon e mes ta haña e desaroyo aki, pero a limitá su mes na bisa ku di tur manera e kaso aki no a kana konforme prosedura. El a bisa, ku di tur manera Raad van Advies lo no reuní promé ku dia 2 di mei awor. E próksimo reunion di Raad van Advies ta dia 5 di mei.
Miéntras tantu e avisonan a sigui den prensa normalmente ku dia 2 di mei ta un dia ofisialmente liber.
LA PRENSA a optené tambe e karta ku e minister a manda pa e dos órganonan aki. Remarkabel ta, ku e minister ta bisa, ku e lo garantisá ku e kaso aki lo no pasa mas. Nos tin mas detaye di e karta aki den nos edishon di awe i tambe un entrevista ku minister Tjin A Sjoe riba e desishon aki.