ORANJESTAD- Ayera e sindicatonan den accion a bai na medidanan mas drastico y pa banda di 9’or di mainta, varios trekker y otro autonan, a blokia tur entrada pa tereno di waf na Oranjestad y inclusive a blokia tur pasada banda di e turbo retonde cu ta bai direccion di Oranjestad.
E accion aki a paralisa tereno di waf por complete y ningun actividad comercial por a sigui su curso ayera y tanto comerciantenan como esnan cu tin tourbus, a keda sin por a haci nada.
Polisnan a presenta na e sitionan pero no por a haci mucho cos ya cu fuera cu Cuerpo Policial ta actuando aworaki cu e asina yama “minimale besetting”, polis no tin material pa actua den un caso asina y caminda nan por hala e trucknan grandi aki.
Sinembargo mey mey di esnan den accion, por a mira un cantidad di miembronan di Cuerpo Policial di Aruba, cu tambe ta den lucha pa haya indexering, un derecho cu e Gobierno di MEP a vries na 3 anja cu e promesa cu e proceso akilo a dura tres anja, pero ya a pasa shete anja caba.
Den waf di Oranjestad tabatin un crucero grandi ayera mainta y tur tour organiza pa esnan riba e barco, no por a sigui ya cu no tabata permiti ningun tourbus pasa bai tereno di waf.
Cantidad di turistanan cu a baha for di e barco, a mustra ansha pa e situacion y gran mayoria a regresa e barco mesora, ya cu nan no tabatin nocion di loke tabata pasando serca din an.
Un situacion realmente confuse a reina henter mainta y cu a bin colma den e accion di e trahadornan dilanti oficina di Gobierno den oranan di anochi.
Awe mainta e sindicatonan lo reuni pa determina kico ta bai haci pa presiona gobierno ainda mas, y no mester exclui e posibilidad cu otro sindicatonan lo uni nan mes na e accion aki, pa sostene e trahadornan di gobierno den nan lucha.
Ta ser spera c’un ora pa otro awa y coriente lo cai afor como cu e sindicatonan cu ta representa trahadornan den e sector aki, a forma parti di e delegacion di bon boluntad cu ayera a pidi e partidonan pa sinta na mesa na Radisson Hotel, pero caminda Gobierno a nenga di asisti.