WILLEMSTAD - Ayera tardi na Curaçao Airport riba patio di Cinabbon i Sbarro, a tuma lugá un konferensha di prensa kaminda Curaçao Team Tennis Foundation a duna informashon di nan torneo di e aña aki.
Primeramente sr. Elmer Pablo na nòmber di Curaçao Team Tennis Foundation a yama bon biní na e invitadonan i a elaborá riba e echo e aña aki lo bai selebrá e di 10 edishon di Team Tennis ku tur aña di nobo ta hala hopi partisipante i fanátiko.
Seguidamente sr. Robert Martis a wòrdu introdusí.
El a duna un splikashon di e konsepto di Team Tennis ku básikamente un tim ta konsistí di mínimo 2 hende hòmber i 2 hende muhé i un máksimo di 3 hende hòmber i lo hunga den tres kategoria i e weganan lo tuma lugá na Asiento, CSC i RCC.
E fecha di apertura ta djaluna 5 di mei i e torneo lo dura te 24 di mei.
Seguidamente sr. Lesley Peterson sekretario di Team Tennis Foundation a trese dilanti algun regla di e torneo i a duna un splikashon di e sekuennsia di weganan ku ta Sensiyo Femenino i Maskulino, Dòbel Femenino i Maskulino i Dòbel Miksto.
E ekiponan ta bai na akumulá punto pa ta bon posishoná pa avansá pa e siguiente buèlta.
Den e promé buèlta e ekiponan lo hunga den Pul, miéntras ku e último buèlta lo ta hunga segun e sistema di nòkout.
Edgar Ribeiro direktor di Sorefan Trading ta sumamente kontentu ku e Fundashon Team Tennis i e aña aki tambe Jumex Sport lo ta presente den Team Tennis.
Ta asina ku durante wega e partisipantenan lo por disponé di e bebida rehidrante Jumex, kompletamente grátis.
Representante di Insel Air a trese dilanti ku Deporte ta prioridat #1 pa INSEL Air i gustosamente nan a ripití nan partisipashon e aña aki.
Sra. Elaine Angela a trese dilanti ku komo kompania nashonal nan ta konsiente di nan responsabilidat pa ku deporte sigur mirando e resultadonan ku Kòrsou ta opteniendo internashonal.
Maryanella Emerensiana representando Deloitte, a trese dilanti ku komo partner prinsipal di e torneo nan a bin ta mira desaroyonan grandi atraves di e 10 añanan ku nan ta spònser i ku plaser nan ta duna nan aporte na e fundashon aki.
Jaira Hato representante di Sbarro i Cinabbon a partisipá ku nan a djòin e tim di spònser e aña aki i mirando e plannan di e fundashon nan no tin duda di sigui duna nan a aporte na bienestar di e deporte di Tènis.
Por último sr. Ray Treurniet direktor di Carribean Data Processing Center, a “lounge” e wepsait di Team Tennis ku ta www.teamtennis.info i riba e wepsait aki bo por haña tur informashon di e torneo aki.
Na final Elmer Pablo representando Changes Pro-Sport anunsiá ku e marka deportivo K-Swiss lo bai pone algun premio realmente atraktivo pa e partisipantenan den forma di sapatu deportivo pa e Hungadónan Mas Balioso.
E aña aki Fundashon Team Tennis lo dediká e torneo na e lucha kontra di kanser.
Tumando na kuenta ku di un òf otro manera nos tur por haña nos enbolbí ku e teribel malesa aki i sigur pa e echo ku Reginald “China” Statius miembro di direktiva di Fundashon Team Tennis a pèrdè e bataya kontra e malesa aki, e fundashon lo bai konsientisá e partisipantenan i e públiko riba e echo ku kanser ta kurabel basta bo atendé kuné na tempu.
Inskripshon ta posibel te dia 25 aprel na tur e klupnan òf via di nos wepsait.
Pa mas informashon por yama 561-6735 òf 511-0055.