Skina di Sorti, awe djasabra 19 di aprel di 2008, ta kuminsá ku deseá tur hende un bon dia. Na Ulanda drs. Alexander Pechtold, lider polítiko di D66, a tuma e partido ku e tendensia elektoral di un “stervende zwaan” i awor tin’é den un kresementu aselerá espektakular, kaminda segun último sondeonan D66 awor ta na 10 pa 11 asiento. Pues un diferensia di 8 asiento for di resultado di e último elekshon. E manera ku e kambio espektakular aki a sosodé, no ta nada milagroso, pero simplemente resultado di un aserkamentu stratégiko asertá.
****
Laga mi splika e lokual a pasa ku D66, bou di liderazgo di drs. Alexander Pechtold, segun e modelonan ku mi a bini ta usa pa analisá prosesonan polítiko. Mi a splika na vários okashon ku den e kuadro polítiko tin 4 grupo di influensia banda di e rivalidat entre partidonan polítiko ku ta impaktá posishon elektoral di kada partisipante na un elekshon i nan respektivo posibilidat pa hiba un gobernashon efektivo pa pais.
****
E grupo ku naturalmente tin mas peso ta elektorado. E promé kos ku drs. Alexander Pechtold a kambia den forma fundamental ta e agènda polítiko di D66. En bes di asuntunan ku ta poko leu for di e prioridatnan dje elektorado, manera kambio dje organisashon demokrátiko ulandes, D66 awor ta tuma posishon den un forma pronunsiá riba temanan ku elektorado ta konsiderá puntonan di su prioridat.
****
E estilo den kual e ta presentá e puntonan ta populista, pero ku kontenido. E ta mustrando kontenido i komo ku gobernantenan i koleganan di Tweede Kamer ta tum’é na serio, poko pero sigur D66 ta wòrdu konsiderá, un alternativo di gobernashon. E rèspèt ku promé minister dr. Jan Peter Balkenende a ekspresá pa e aserkamentu di drs. Alexander Pechtold, durante di tratamentu dje presupuesto ulandes, ta un dje momentunan krusial den e surgimentu dje strea di e lider polítiko nobo di D66.
****
Pero no ta den un vakuo e votador ta biba i tampoko no t’asina ku e votador no ta kai bou di esfera di influensia di otronan. Entre e votador tin ku ta miembro di un organisashon polítiko (e forma den kual e ta partisipá por ta di fanátiko, finansiadó, òf te hasta di kandidato riba lista òf miembro di direktiva). Otronan ta miembro di un mobilisashon no polítiko (sindikato, prensa, movimentu ambiental), otro ta kontemplá un partido nobo.
****
Ta p’esei mi ta definí otro gruponan di influensia den e kuadro polítiko komo mobilisadornan no polítiko ku tin e di dos peso den e kuadro. Sin prensa, sindikato, i gruponan di interes ku ta mobilisá e votador su desishon indudablemente ta hopi diferente. E lider polítiko nobo di D66, drs. Alexander Pechtold a desaroyá un profilamentu polítiko ku a kai bon serka Prensa. Na momentu ku bo no tin nodi di asumí un postura defensivo ante un grupo di influensia den e kuadro polítiko, bo desgaste di rekurso ta minimal.
****
Na momentu ku bo ta bon den bista di un grupo di influensia, esaki ta sirbi komo un forsa ku ta magnifiká bo profilamentu. Lokual drs. Alexander Pechtold a usa sumamente bon komo trapi ta e atenshon eksagerá ku lider polítiko di PVV, Geert Wilders a krea pa su mes den medionan di komunikashon sosial. Ku su posishonamentu kontra di Geert Wilders den debatenan (lokual hopi otro tin miedu pa hasi), drs. Alexander Pechtold a haña eksposishon ku masha poko desgaste di rekurso.
****
Un di tres grupo di influensia ante kual drs. Alexander Pechtold a krea un bon posishon t’esun di fasilitadornan kaminda bo tin finansiadó, aktivista, eventual kandidatonan i intelektutalnan (ta aki bo fuente di ideanan nobo ta bini). E grupo aki ta e di tres den peso despues di elektorado i mobilisadornan no polítiko. Kresementu di un partido ta dependé prinsipalmente dje grupo aki. Sin plaka, sin ideanan nobo i sin kandidato nobo, kontinuidat di un organisashon polítiko ta bou di preshon enorme.
****
Un di 4 grupo di influensia ku hopi no ta paga sufisiente atenshon na dje (sigur na Antia e énfasis riba rivalidat entre partidonan ta simplemente ridíkulo) te ora ku ta lat kaba (ora ku e partido nobo a bira un realidat) ta esun di eventual partisipantenan nobo. Pa tur esnan ku ta den e kontienda kaba mas partisipante por lo general ta nifiká un deterioro di e atraktividat dje sektor en general. Mas entidat pa repartí rekursonan riba di dje i mas kompetidor den e respektivo segmentonan elektoral.
****
Esun ku ménos ta provoká otronan pa drenta pa kompetí kontra di dje, pa definishon ta mihó para. Manera mi a splika ménos postura defensivo ta nifiká ku mas rekurso ta disponibel pa yega serka elektorado. Na e momentunan aki, D66, ku ménos énfasis riba kambio den e sistema (ménos diskushon akadémiko) i mas énfasis riba kosnan mas serka dje elektorado, mas bien ta provokando ku hendenan ta hala kita for di PVV pa bai su tras.
****
Den e último dianan mi a mustra kon aki na Kòrsou, apesar ku nan aserkamentu no ta duna resultado, organisashonnan polítiko ta keda pèrdè nan mes ku mas di e mesun kos. Te hasta bo ta mira kon partidonan ku bon rekurso, ku un potensial stratégiko grandi ta pèrdè su mes den diskushon interno riba kosnan ku no tin ningun relevansia.
****
Pa lokual ta e proseso elektoral merikano, e primario na Pensilvania ta birando mas i mas importante ainda pa e senador di New York, Hillary Rodman Clinton. Ku senador Barack Obama trompekando formalmente den e fase krusial aki dje kontienda, un viktoria eklatante di senador Hillary Rodman Clinton na Pensilvania lo por sirbi un faktor katalisador mortal pa Barack Obama.
****
Den e último debate senador Barack Obama a mustra inkómodo i prensa ku te ainda tabata basta “lief” ku Obama a hole sanger. Pa kolmo Barack Obama a kometé un fayo mas dor di bisa ku pe ta basta ku debate. Bo no mag di habri kaminda pa interpretashon ku bo ta kore pa konfrontashon awor ku bo a haña sla.
****
E kosnan aki ta importante pasobra al final di kuenta ta e super delegadonan ta bai determiná e resultado i Barack Obama ta kreando argumento pa esnan ku apesar di Barack su bentaha den votonan popular lo ke bai ku e poder lòbiista polítiko di e Clintonnan. E kontienda merikano ta keda “too close to call”.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.