Lorito ta yama tur hende un felis djasabra. Djasabra tin su kosnan partikular kuné. Einan mes e ta un dia mas lento, pero di otro banda korant ta pone masha preshon riba tempu!
*********
Ku rèspèt pa tur hende, algun dia a pasa sin ku nos sa te awe ken ta Cayco. Nos no a haña sa kuantu sèn nan tin, ken ta representá nan, kiko ta nan plannan konkreto, kua patu a brui nan (sòri pa e formulashon!), unda nan ofisina prinsipal ta etc. etc. ta masha pregunta tin habrí den e kaso aki!
*********
Nos tin e impreshon ku Nini ta keriendo demasiado ku e ta un tipo di minister. Pa refreská su memoria, nada no por pasa si un mayoria den Bestuurscollege no ta na altura te pa nan ta di akuerdo. Asuntu di kere ku bo por yega bou di brasa ku dokumentunan pa haña aprobashon ta maneho di ántes (di kouchi boulo). Duna nos tur informashon pa nos mes huzga. I pidi Cayco pa stòp di usa satélitenan. Nos kier wak ken nan ta!
*********
E artíkulo ku LA PRENSA a publiká e siman aki riba e polítiko prominente ku a trata di kue seguro kabes abou ta komentario tur kaminda. A base di informashon ku nos tin aki ta trata di un kaso masha serio. E polítiko mester stòp di usa su satélitenan pa manda yen di mensahe i atendé e kaso aki ku por result’é masha karu. Ora bo hasi e tipo di kosnan aki, en realidat bo ta violando lei. Ojo!
*********
Ademas nos no ta kere ku e kompania tin ningun interes pa no paga e polítiko-kliente, ku ta kliente meskos ku tur otro hende. E kompania mester tene kuenta ku su stipulashon i regulashonnan i no por benefisiá niun hende mas kon popular bo ta!
*********
Un pabien spesial ta bai awe pa Partido Nashonal di Pueblo ku ta kumpli 60 aña. Ta kos di selebrá! PNP sigur a haña su lugá den nos konstelashon polítiko. Un partido ku a subi, baha, subi, baha, subi, baha i ketu bai t’ei. Den demokrasianan parlamentario ta difísil pa partidonan ku trayektoria amplio mantené nan mes. Semper nan ta haña reto di kosnan nobo, pero finalmente tòg nan ta logra sobrebibí.
*********
Partido Nashonal tin un futuro briante su dilanti ku un generashon nobo di polítiko ku lo produsí mas voto pa e partido si nan haña mas espasio (Alex, Gisette i otronan). A bira tempu pa e generashon di ántes kuminsá hala atras pa duna e grupo aki un chèns, pa duna e partido un aliento nobo. Un pabien di kurason na tur hende di partido. Un pabien spesial pa Zus ku nos sa ku ta traha masha duru tur dia i ku ta un Yu di Kòrsou di pura sepa. Den e tempunan aki di inseguridat estatal, mas ku nunka PNP mester pone su stèmpel riba Kòrsou Promé! Pabien!
*********
(foto Ada)

Un pabien tambe awe na Ada di Mundu Nobo Esneck ku a kumpli aña awe. Di tur e esnecknan na Kòrsou, no tin niun di nan ku ta duna un mihó servisio ku Ada. Asina bo yega pa ku kumpra bo pastechi (esun di bakiou ta kampeon!), Ada ta risibí bo ku un sonrisa asina grandi i ta drecha bo dia mesora. Hopi biaha hende ta reklamá servisio, pero Ada ta ehèmpel di kon trata TUR hende bon. Pabien ta bin di parti di LA PRENSA, prinsipalmente di André, Elvin i Mariano. Felicidades!
**********
Nos ta keda te aki awe. Pasa felis djasabra i djadumingu. Te djaluna awor ku Dios su poder!