WILLEMSTAD – Kontrali na e persepshon ku diputado di Infrastruktura Anthony Godett a duna e siman aki, Bestuurscollege ta leu for di duna lus bèrdè pa e proyekto Cayco. Ta resultá ku PAR i PNP tin duda serio riba e proyekto.
Diputado Godett a trata di pasa e proyekto komo “nagekomen stuk” djarason último. El a drenta reunion di Bestuurscollege ku e dokumentunan bou di su brasa i trata di haña aprobashon di su koleganan pa e proyekto. E diputadonan di PAR a pidi pa wanta ku e tratamentu te ora tin mas klaridat riba e proyekto. Lider polítiko di PAR Emily de Jongh-Elhage a manda instrukshonnan estrikto pa e diputadonan di su partido kon pa atendé e asuntu aki. E dirigente polítiko ta preferá pa e asuntu aki bira punto di diskushon den e lidernan di koalishon promé. Dia a forma e gobièrnu nobo entre PAR, PNP i Frente a palabrá ku no ta sorprendé otro ku intenshon i/òf desishonnan. A disidí tambe, ku puntonan ku no tin klaridat riba nan òf por bira un problema, ta bai e plataforma di lider polítiko. Pa loke ta trata Partido Nashonal, e partido no tabata representá den e reunion di djarason último komo ku su úniko diputado (Humphrey Davelaar) a hisa bela bai Ulanda.
Informashonnan ku LA PRENSA a haña ta indiká, ku PAR a warda yegada di diputado Eugène Rhuggenaath for di Costa Rica djaweps último pa atendé e asuntu aki internamente. Diputado Godett a bisa den su konferensha di prensa di djaweps último, ku su kolega diputado di Asuntunan Ekonómiko i Turismo ta na altura di e interes di Cayco. Durante e reunion di PAR a disidí ku pa awor aki e proyekto Cayco lo no konta ku sosten, sino te ora tin un presentashon ofisial i haña sa mas konkretamente kiko e proyekto ta kome i bebe. Diputado Godett a informá PAR, ku kada bes ku ta su proyektonan ta manera tin opheshon kontra nan, pero el a haña komo kontesta, ku proyektonan mester kana e kaminda korekto i sigur transparente, algu ku PAR a bin ta prediká pa hopi aña.
Miéntras tantu den seno di PAR i PNP tin disgustu pa e manera ku Godett komo diputado a referí na e invershonistanan di e proyekto di Hotel Renaissance. Prinsipalmente e hecho ku el a informá inkorektamente ku e hotèl ta na benta i ku un grupo spañó lo bai kumpra hotèl a krea disgustu. E empresa Meta Corporation a desmentí e informashon aki kategórikamente bisando, ku den su maneho e no ta traha hotèl pa bende ku tersera. Un otro kos ku no a kai den bon tera ta e parti kaminda Godett a insinuá ku Meta/Credit Suisse tabatin plannan di DROV ilegalmente den nan poder. Ta resultá awor ku esei no ta e kaso. Meta Corporation tabata un di stakeholdernan di e diskushonnan riba desaroyo di e área di Rif i no tabatin nesesidat pa “kue” nada.
E reunion públiko di Konseho Insular riba e tema aki ku mester tuma lugá djamars awor, ta halando atenshon. Komo ku por lo ménos un diputado miembro di Konseho Insular ta den eksterior, no ta sigur ku e reunion lo bai sigui e dia ei.