WILLEMSTAD – Obispu di Willemstad, Mgr. Luis Secco, ta bisa ku e kantidat di fiel ku ta pèrdiendo e kaminda di fe ta birando dia pa dia mas grandi. Esei ta hasi e tarea di saserdotenan mas difísil. Saserdotenan mester kumpli ku nan mishon i no gosa di e prestigio so ku e mishon di ta saserdote ta duna nan. Segun Obispu Secco, nan mester mantené e fielnan huntu. “E tarea mas importante di un saserdote (wardadó), ta esun di buska e karnénan ku a pèrdè e kaminda, ku a alehá for di e kaminda, ku ta den peliger di pèrdè nan bida. E tarea aki awendia ta mas urgente ku nunka, pasobra no ta solamente un karné òf un grupo chikitu ku a pèrdè, sino hopi, i ta parse ku e kantidat ta birando mas grandi dia pa dia”, asina e prelado a bisa awe mainta na ordenashon di José Guillermo Ortega komo saserdote den Basílika Santa Ana. “Ami ta e bon wardadó; e bon wardadó ta entregá su bida pa e karnénan (Hn 10,11). Den e tempu di Pasku aki i despues di e djadumingu di e Bon Wardadó, nos tin e legria di selebrá e ordenashon presbiteral di nos ruman Guillermo, den un konteksto litúrgiko asina yen di mensahe profundo di e Palabra di Dios i di e tradishon di Iglesia. E komparashon di e bon wardadó ta duna nos e oportunidat pa kompartí su nifikashon un biaha mas i aplik’é na e mishon di nos futuro saserdote. Den e tradishon kristian e bon wardadó ta keda representá bou di tres aspekto: e ta karga riba su skouder e karné pèrdí; e ta guia e karnénan pa nan haña alimento, yerba bèrdè i awa fresku, i ku su baston e ta reuní i ta defendé nan kontra tur peliger. Nos tur tin presente un dje promé representashon di Hesus den e ikonografia kristian ku ta mustra un wardadó ku ta karga un karné riba su skouder i e tin un baston na su man. E ta indiká ku un tarea importante, si no esun mas importante di e wardadó/ saserdote, ta esun di buska e karnénan ku a pèrdè e kaminda, ku a alehá for di e kaminda, ku ta den peliger di pèrdè nan bida. E tarea aki awendia ta mas urgente ku nunka, pasobra no ta solamente un karné òf un grupo chikitu ku a pèrdè, sino hopi, i ta parse ku e kantidat ta birando mas grandi dia pa dia. E bon wardadó ta guia e karnénan pa duna nan alimento i awa; esaki ta nifiká e tarea di evangelisá, di alimentá nan ku e Palabra di Dios i ku e sakramentunan di Iglesia, na un manera partikular ku e Santa Eukaristia. E bon wardadó ta reuní i defendé e karnénan kontra tur peliger: e gran mishon di e wardadó ta pa mantené e karnénan huntu, mantené e unidat, forma e komunidat, i tambe loke ta un tarea poko agradabel, di spièrta i koregí ku amor e karnénan ku a desviá for di e bèrdat di Hesukristu i di su Palabra”, asina Mgr. Secco a bisa. Mas aleu Obispu a bisa ku den e dokumentunan i predikashon di e último papanan, por nota ku e figura di e bon wardadó ta fuente di hopi inspirashon i ta manera e imágen ku no ta pèrdè nunka su forsa i aktualidat pastoral. “Den e dos Eksortashon Apostóliko postsinodal “Pastores dabo vobis” i “Pastores gregis”, Papa Huan Pablo II, ta animá e pastornan i obispunan riba e vokashon i e mishon di kada un ku tin e responsabilidat den Iglesia pa guia i duna speransa na e karnénan ku Iglesia a konfia na nan. E palabra di Profeta Ezekiel, den e promé lektura, ta invitá nos pa hasi un saminamentu di konsenshi riba e solisitut pastoral di e wardadónan di e tempu ei i di nos tambe awendia. Den e liturgia di Horanan di e siman 24 i 25 di aña litúrgiko, San Agustin ta komentá e kapítulo aki di profeta Ezekiel, i e ta hala e atenshon na un manera fuerte kontra e wardadónan ku no ta kuida e karnénan, ma nan ta sòru solamente pa nan mes: “Boso ta bebe e lechi, uza e lana pa boso pañanan ... boso no a kura e karnénan ku tabata malu,... boso no a bai buska e karnénan pèrdí... boso a goberná sin tene duele,... mi karnénan tabata sin wardadó i a plama den diferente direkshon i nan a bira víktima di e bestianan feros. (Ez 34,3-5). Sin keda den e parti negativo, San Agustin ta bisa ku tin tambe hopi bon wardadó den kunuku di Señor; i tur e bon wardadónan mester identifiká nan mes ku e úniko Wardadó ku ta Hesukristu! Papa San Gregorio (siglo VI) a yega di bisa ku “mundu ta yen di saserdotenan, pero ku ta hopi difísil pa haña un trahadó pa e kunuku di Señor; pasobra nos a risibí e ministerio saserdotal, pero nos no ta kumpli ku e debernan di e ministerio aki... nos ta deskuidá fásilmente e ministerio di predikashon... nos ta disfrutá dje prestigio ku e ministerio aki ta otorgá nos, pero nos no ta poseé e birtut ku e nòmber aki ta eksigí”, asina Mgr. Secco a bisa.
