WILLEMSTAD – “Partido Nashonal di Pueblo t’ei pa keda”. Asina lider di e partido Ersilia de Lannooy a bisa relashoná ku 60 aniversario di e partido awe. Segun De Lannooy, no tin niun kas na Kòrsou kaminda e rais di Partido Nashonal no ta planta. Ta esei ta éksito di e partido ku tabata asina fundamental den emansipashon di nos pueblo.
Un grupo di persona ku tabata afiliá promé na Katholieke Volkspartij (KVP) a funda Partido Nashonal di Pueblo dia 19 aprel 1948. E grupo aki na sierto momento no tabata satisfecho mas ku e polítika konservador i tolerante pa ku e sistema kolonial di e tempu ei, ku e partido aki tabata hiba i nan a tuma nan mes inisiativa.
Despues ku Partido Democraat a gana e elekshon di novèmber 1945 na un manera aplastante, kasi un aña despues ku e partido aki a keda lantá (desèmber 1944), riba instrukshon di Mr. Dr. Moises Frumencio da Costa Gomez, un grupo di persona ku ainda tabata forma parti di KVP, manera un George Lodowicka-Beltram, Nene Davelaar, Jul Cratsz, Frank “Spin” de Lannoy, Hendrik Pieters Kwiers i Anibal Visceiza i algun otro, a kuminsá ku nan lucha “under-ground” den tur skina di Kòrsou, pero prinsipalmente den barionan fuera di stat pa haña sosten pa e idea pa a lanta un partido polítiko, komo un alternativa pa KVP i DP!
Na 19 di aprel 1948, a yega asina leu ku “Nationale Volks-Partij” (NVP) a keda lantá i e promé direktiva di e partido tabata konsistí di, Mr. Dr. Moises Frumencio “Dòktor” da Costa Gomez (Presidente), Hendrik Pieters Kwiers (vise-presidente), i komo miembronan, Efi Newton, Nene Davelaar, Jan Eleonora, Carlos Celestina, Eddy Broos, William Rufus Plantz i Anibal Visceiza, e último aki ta e úniko ku te ku dia di awe ta na bida.
Sra. De Lannooy a bisa ku Partido Nashonal di Pueblo “PNP” ta un partido ku rais fuerte den e pueblo di Kòrsou. PNP ta e partido ku a nase for di pueblo pa lucha pa emansipashon i igualdat di tur hende, pa dignidat, pa rekonosementu i rèspèt di e hòmber i muhé. PNP su polítika ta basá riba prinsipionan kristian-demókrata, esta: hustisia sosial ku ta enserá amor pa esnan sosialmente i ekonómikamente mas debil den nos komunidat, solidaridat ku ta enserá e boluntat pa karga responsabilidat pa otro, subsidiaridat loke ke men responsabilidat kompartí, pluralismo ku ta nifiká rèspèt i aseptashon pa pensamentu di kada ken i mayordomía ku ta enserá ku mester kuida i protehá kreashon di Dios esta e mundu ku nos ta biba den. E prinsipionan básiko aki segun PNP, ta e fundeshi pa forma nos komunidat. Ta nan ta e base pa PNP su vishon.
PNP su vishon pa futuro di Kòrsou ta:
- Un pais kaminda yunan di Kòrsou ta biba den harmonia ku otro. Yu di Kòrsou ta esun ku ta biba, traha i aportá na un manera positivo i segun nos leinan na desaroyo di nos pais, no importá di unda e ta bin i sin distinshon di rasa, kredu, género ò nashon.
- Un pais den kua kada hende por desaroyá su mes den libertat, ku interakshon harmonioso ku otro hende i naturalesa. Kaminda nos hendenan ta konsiente di e realidat ku un tin di sostené otro.
- Un pais den kua gobernashon ta sirbi interesnan di tur hende i ta mantené un balanse korekto entre tur gremio di nos komunidat. PNP ke un Kòrsou kaminda un i tur ta karga su desaroyo i su ekonomia.
- Un pais kaminda estranheronan ta bon biní den un kuadro deliñá, esta un maneho pa imigrashon i estranheronan.
- Un pais kaminda tin protekshon adekuá di kalidat di bida di kada siudadano, spesialmente esnan ku un retraso soshal-ekonómiko, sin limitashon inhustu pa esnan ku a base di desaroyo di nan abilidatnan, ta logra un adelanto.
- Un pais den kua toma di desishon ta a base di partisipashon demokrátiko.
- Un pais den kua hustisia ta atendé rápidamente tur infrakshon kontra hende i komunidat.
Pa realisá e vishon aki ta eksgí esfuerso di un i tur ku ta biba na Kòrsou i ku ta stima e pida baranka aki. Pesey meta di PNP ta: Desaroyá un komunidat, kaminda kada siudadano lo por i ta dispuesto pa karga su propio responsabilidat i pa esnan ku ta dependé di dje. Punto di salida di PNP ta bienestar di tur siudadano. Pa logra esaki kada siudadano mester tin e posibilidat pa desaroyá su mes, pa e duna kontenido na su propio bida i eduká su yunan, pasobra PNP semper a kere den “siña hende piska na lugá di dun’é piská”.
Partido Nashonal di Pueblo ta komprometé su mes, pa hasi tur lokual ta na su alkanse pa promové seguridat, harmonia i desaroyo pa un i tur, komo elementonan indispensabel pa logra su meta a base di su prinsipionan kristian demókrata. For di esaki ta surgi balornan manera rèspèt pa kada persona, libertat pa kada ken su desaroyo personal i rèspèt pa kada konvikshon religioso. Sin desaroyo ekonómiko ta imposibel pa logra e metanan ku PNP ta visualisá. P’esei PNP ta kere ku nos mester fiha kon ekonómikamente por desaroyá Kòrsou, di tal forma ku e por produsí e medionan finansiero ku mester pa nos komunidat por funshoná di un manera optimal.
Kardinal den desaroyo ekonómiko ta ku nos ke progreso. Progreso ta nifiká mas desaroyo ku nos tin awor. Pa logra esaki nos mester kompetí ku paisnan kaminda e formashon di hende ta di vital importansia. Entre otro India, China, Singapore i otro paisnan asiátiko ku ta pone formashon na promé lugá. Ta p’esei Doktor Da Costa Gomez a pone komo punto di salida emansipashon di e hende i a pone hopi énfasis riba formashon e.o. dor di introdukshon di beka pa studiantenan. Kardinal ta pa duna prioridat na e mihó formashon posibel, ya ku ta esaki ta e faktor determinante den kosto di trabou di hende i un bon entrada ta duna hende e medio pa sòru pa su mes, asina e lider di Partido Nashonal a bisa.
Partido Nashonal ta selebrá su di 60 aniversario ku ponementu di un krans na estatua di su fundador Dr. Moses Frumencio da Costa Gomez. Awe nochi lo tin un anochi kultural na Riffort Village.
Fortifikashon di famia
Last bus not least pa nos logra e vishon pa Kòrsou mester fortifiká nos famianan. Esta famia komo un unidat di kombibensia duradero. Famia no ta un konsepto limitá na tata, mama i yunan. Un famia ta un unidat sosial, karakterisá pa un konvivensia komun i koperashon ekonómiko. E ta inkluí adulto, hóben òf mucha. Nan por ta uni pa sanger, amor òf kariño. Famia ta e núkleo di konvivensia duradero, den kualkier forma ku e por ta.

PNP lo para fuerte pa un maneho dirigí riba kreashon di kondishonnan adekuá pa un desaroyo familiar. Un famia ku ta sòru pa desaroyo spiritual, mental i físiko sano di kada individuo, kada ken, ku ta forma parti di dje ta forma base pa hinter un komunidat sano. I ta esaki nos tur tin ku ban traha p’e, segun PNP.

Os. 1 PNP – Anibal Viceisza ta e úniko sobrebiente di e grupo entusiasmá ku a lanta Partido Nashonal dia 19 di aprel 1948.


Os 2 PNP - Ersilia

E lema nobo di Partido Nashonal ta “PNP pa tur generashon”. Lider di e partido Ersilia de Lannooy a demostra su afekto pa un generashon nobo.