WILLEMSTAD – “Gobièrnu di Kòrsou i Antia huntu tin un défisit akumulá di kasi 300 mion florin, komo konsekuensia di e situashon nobo ku a presentá awor ku e proseso di saneamentu no por kuminsá mas na e momentu ku a palabra.
Gobièrnu di Kòrsou, kombiná ku gobièrnu antiano lo mester subi merkado di kapital awor pa weta si por haña e montante aki fia. Nos a atvertí pa e kos aki, pero un biaha mas, no kier a skucha nos”, asina mr. Nelson Navarro, miembro di frakshon di Forsa Kòrsou den Staten a denunsiá.
“Tal manera nos a informá anteriormente, Gobièrnu di Kòrsou lo mester subi e plafònt ku a fiha anteriormente pasobra Kòrsou mester por fia pa kubri e défisit ku a surgi riba presupuesto 2008”. Esei di akuerdo ku diputado di Finansa Mike Willem.
Esaki, komo konsekuensia di e hecho ku e panorama finansiero a kambia, awor ku 15 di desèmber 2008 no ta alkansabel mas.
Dia teritorio insular di Kòrsou a formulá su presupuesto pa 2008, el a sali for di punto di bista ku un parti di e défisit, pa e montante di mas o ménos 66 mion florin lo bira e parti di défisit ku e mes ta kubri. Pa esei, mester a bin un plan kon ta kubri esaki, e asina yamá “dekkingsplan”. Pero banda di esei, ta keda un défisit di 103 mion florin, ku Ulanda a keda di kubri.
Esaki, basá riba e akuerdo ku Kòrsou a sera ku Ulanda, ku Kòrsou lo no fia mas ku e plafònt ku a fiha pa e isla hasi fiansa. Awor ku no tin akuerdo, konsekuentemente no por konkretisá e saneamentu di debe tampoko, mester subi merkado di kapital atrobe, pa bolbe fia. Esei lógikamente lo surpasá e plafònt palabrá ku Ulanda.
E diputado a bisa finalmente, ku e no ke papia di e senario ku e saneamentu no ta sigui mas pa e aña aki. Loke nos ta konsiderá ku ta pasando awor aki ta, ku a surgi un retraso den formalisashon di e Kolegio pa Supervishon Finansiero. Pero ta sigui traha riba saneamentu di debe, el a indiká finalmente.
“Gobièrnu Sentral ta den un situashon similar, pa e montante di mas o ménos 130 mion florin. anto nos a atvertí pa e kos aki”, asina parlamentario mr. Nelson Navarro a konstatá.
El a bisa ku for di durante tratamentu di presupuesto, frakshon di Forsa Kòrsou a atvertí gobièrnu pa no bira kontentu ku un kos ku no ta sigur ainda.
“Nos a bisa ku si Ulanda no kumpli, presupuesto lo haña buraku. Lamentablemente, nos a haña rason. Nos a bisa semper, ku mester a ankra e saneamentu aki den lei. No den Memorie Toelichting,” el a bisa.
Loke Navarro a lamentá mas tantu ainda, ku atrobe, manera e mes a bisa, e trayekto di kambio estatal ta sufri tardansa. Anto e konsekuensianan di esaki ta motibu di preokupashon.
Antia ta sigui akumulá debe. Te na unda nos por wanta e kos aki? e parlamentario di Forsa Kòrsou a puntra.
Nelson Navarro ta kere ku awor si mester bin ku fecha realista. Un fecha realista di saneamentu di debe, un fecha realista pa e kambionan estatal drenta na vigor. E gobièrnu aki a primintí hopi, pero te ainda nos no ta wetando kosnan konkreto, el a señalá.
Nelson Navarro a bisa finalmente, ku e ta kere ku e mihó kos ku e gobièrnu aki por hasi, ta di buska aserkamentu ku oposishon, pero un aserkamentu a base di sinseridat.
Den e kos aki, ta konhuntamente, koalishon i oposishon nos mester enfrentá Ulanda, el a agregá.