ORANJESTAD- Diadomingo 20 di april 2008 tabata un dia historico pa e pueblo di Paraguay. Despues di mas di seis decada di gobernacion dor di e mesun partido politico, por fin a bin cambio.
E candidato di e Alianza Patriotico pa e Cambio, ex-obispo Fernando Lugo a gana e eleccion y ta bira presidente di Paraguay y hefe di su gabinete. Mi a manda de inmediato palabra di felicitacion, mirando e contacto personal cu mi tin cu Fernando Lugo.
Fernando Lugo a nace 30 di mei 1951 na Paraguay, despues di studia teologia e a keda ordena sacerdote na 1977. Despues e a studia sociologia na Roma y na 1994 e a keda ordena Obispo den e region di mas pober di Paraguay.
Dia 8 di December 2006 e a oficia misa pa ultimo biaha, pa motibo di su decision di drenta politica. Den e predicashi di su ultimo misa e a bias: “Mi catedral awor lo ta mi pais”.
Vaticano a nenga di acepta su renuncia di su funcion sacerdotal y a pidi Mons. Lugo pa e no desobedece e ley canonigo cu ta stipula cu un sacerdote no mag eherce funcion di minister of parlamentario of presidente. Fernando Lugo a desobedece e ley canonigo y a postula su mes toch como candidato pa presidente di Paraguay.
For di e momento ey pueblo a cuminza mira den dje un speranza pa cambio. Su campaña contra corupcion y contra pobreza a keda bon risibi. Papa di Roma a reacciona y a impone riba su persona e ‘suspensio a divinis’, es decir cu e no mag di celebra ningun sacramento mas,, pero e a keda cu e titulo di obispo y sacerdote.
Su contricantenan a start un campaña sushi contra su persona. Na television y radio nan tabata jame pa traidor, mentiroso patologico, diablo, satanas etc.
Den e ultimo debate na television algun dia pasa cu e otro candidatonan hasta nan a planea un trampa pe. Danki Dios Mons. Lugo no a cai den e trampa, simplemente e no a presenta pa e debate.
Nan tabata tin planea cu un senjora cu tres jui lo cana drenta e studio y interrumpi e debate y bisa dilanti camera cu e tres muchanan ta jui di Fernando Lugo.
Asina leu e guera sushi contra Fernando Lugo a bai. Diferente meeting politico mester a keda cancela pa menaza contra su bida. Fernando Lugo a haye obliga di cana rond cu bullet-proof vest durante campaña
Mi carta di solidaridad cu Fernando Lugo dia 9 di april 2007 a keda publica den diferente corant na Paraguay. Su triunfo ta un fuente di inspiracion pa mi sigui dilanti cu e lucha pa un cambio di e sistema bipartidista cu pa hopi aña ta domina Aruba (MEP-AVP, tur dos ta mescos).
Su trayectoria ta mustra hopi similitud cu mi mesun trajectoria. Fernando Lugo, sacerdote y obispo, ta cla pa planta honestidad den gobernacion na Paraguay. E siguiente ta Aruba.