ORANJESTAD- Terorismo, vandalismo y anarchismo a yega na su limite ora cu diabierna ultimo den oranan di marduga un grupito di huelgista cu supuestamente ta luchando pa Indexering a comete actonan di terorismo contra e edificio di gobierno, esta Bestuurskantoor.
Entre otro:
1. Nan a blokea e trafico dilanti di Bestuurskantoor door di sinta y drumi riba caminda
2. Nan a kima tire riba caminda y stroba auto di bombero pasa pa acudi na un accidente serio
3. Nan a kibra bentana di Parlamento
4. Nan a tira webo putri riba e porta di Bestuurskantoor, kibra man di e porta y a laga un enorme sushedad atras
5. Nan a trata di bula cu explosivo ‘Devastation’ e transformatorhuis (Hoogspanning – Levensgevaar) pega na Bestuurskantoor y pa despues e teroristanan aki kima tire dilanti porta principal di Bestuurskantoor, cu e intencion serio pa kima henter e edificio aki.
E fotonan cu ta wordo manda adhunto ta papia pa nan mes.
Tur e actonan di terorismo aki tabata posibel pa motibo cu e sindicalista Magaly Brito - kende for di oranan di merdia tabata bon na altura cu hopi alcohol tabata wordo consumi door di e huelgistanan - no tabata tin e habilidad di lider pa contene su hendenan, esta pa manda nan cas y p’asina nan por sosega nan curpa.
Al contrario e mesun Magaly Brito aki mediante di portofoon y via e radio comprometi di AVP tabata roga su miembronan pa nan trece nan familiarnan na e sitio di bochincha y te hasta el a pidi nan pa nan bin cu nan ‘slaapzak’ p’asina nan por pasa henter anochi drumi riba caminda dilanti Bestuurskantoor.
E resultado bochornoso awor ta visible pa un y tur y e biaha aki no ta trata di un simpel klapchi cu a cay riba un stoel di un huelgista.
Lo ta bon pa awe haña comentario di tanto Mike Eman di AVP y Monica Kock di MPA riba kico nan ta pensa di e intento di e huelgistanan cu a comete tur e actonan di terorismo contra Bestuurskantoor, di cual algun luna pasa nan a sali cu tur fervor na su vanguardia, ya cu supuestamente e edificio aki ta un monumento cu mester wordo conserva pa e futuro generacionnan.
Un tiki mas y e monumento di Mike y Monica lo a keda completamente na shinishi y cu un ‘bunita’ bista pa e turistanan cu ta keda den e hotel banda pabao, ya cu te hasta nan amigonan bombero tabata den huelga of den accion di morocoy.