JERUSALEM, - Eks Presidente di Merka, Jimmy Carter, a bisa awe ku lidernan di Hamas, ku kendenan el a reuní na Damasco dianan anterior, a bis’é ku nan lo aseptá un akuerdo di pas ku Israel negoshá pa Presidente palestino, Mahmoud Abbas (Abu Mazen), si e palestinonan aseptá esaki mediante un referèndem.
“E lidernan di Hamas a bisa mi ku nan lo aseptá un Estado palestino ku fronteranan di 1967 si palestinonan aprob’é, ounke por tin diferensia di opinion riba algun klóusula di e akuerdo”, Carter a señalá.
“E dirigentenan di Hamas ta dispuesto aseptá un Estado palestino si e palestinonan aprobá i aseptá derecho di Israel pa biba na pas komo bisiña”, Carter a afirmá den Konferensia di Prensa.
Carter a papia ku Hefe di Hamas den eksilio, Khaled Mashaal, djasabra último na Damasco.
“Esaki ta nifiká ku Hamas lo no sabotiá e esfuersonan di Abu Mazen di negoshá un akuerdo, ku e kondishon basta si e palestinonan aprobá e akuerdo ku voto liber”, e eks mandatario merikano a añadí.
Relashoná ku e posishon negativo di Israel i di Merka riba nan reunionnan na Damasco ku Khaled Mashaal, Hefe di Ofisina Polítika di Hamas, Carter a afirmá ku “problema” no ta su desishon di reuní ku hefenan di e movementu islámiko, sino rechaso di ámbos pais òf kualke kontakto ku Hamas, konsiderá komo organisashon terorista.
“E problema no ta pa mi reuní ku Hamas na Siria. E problema ta rechaso di Israel i di Merka di reuní ku un hende ku mester keda inkluí den e negosiashonnan”, Carter a bisa.
Israel i Merka, ku ta konsiderá movementu di Hamas komo organisashon terorista, a kritiká e enkuentro fuertemente.

Foto: Jimmy Carter 2104

Eks Presidente di Merka, Jimmy Carter, ta papia durante su diskurso na Jerusalem awe.

Foto: Khaled Mashaal 2104

Khaled Mashaal, hefe di Hamas den eksilio.