BEIJING – E sorteo di ayera pa loke ta trata e torneo di futbòl maskulino i femenino na Weganan Olímpiko a kondusí na gruponan fuerte den ámbos kategoria. E kampion mundial Argentina lo topa Oustralia, Kosta di Marfil i Serbia segun e sorteo ku a tuma lugá ayera. E argentinonan ku na Atenas 2004 a kologá pa promé bes oro olímpiko ta den grupo A.
Ulanda a keda na kabes di grupo B ku ta kompletá pa Nigeria, Hapon i Merka.
Brasil ku ta en buska di e úniko título importante ku falta den su vitrinanan yen lo ta den grupo C huntu ku China, New Zealand i Bèlgika. Ulanda ku ta kabes di grupo D ta forma pa Honduras, Italia, Camerun i Sur-Korea.
E torneo na Beijing lo mantené e mesun formato di kuater grupo di kuater ekipo den kua e dos proménan lo avansá pa e kuarto final.
Den e torneo femenino lo tin tres grupo. China lo topa Argentina, Canada i Suesia.
Den e di dos grupo a keda Argentina i Brazil, aktual kampion i sup kampeon mundial, huntu ku Nord-Korea i Nigeria. Merka ku a keda na di tres lugá den e mundial di aña pasá, lo tin den e último grupo ku ta konsistí ademas di Norwega, Hapon i Nueva Zeelandia. Brazil a klasifiká apénas djasabra último despues di a gana un repechahe ku e ekipo di Ghana 5-1. Den e kaso di e kompetensia femenino, e dos promé selekshonnan di kada seri ta avansá pa e kuarto final huntu ku e dos mihó number tresnan.
Tur dos torneo ta ranka sali mesun dia ku Weganan Olímpiko kuminsá dia 8 di ougùstùs awor. Weganan Olímpiko lo kaba dia 24 di ougùstùs.
E final di e torneo femenino lo ta dia 21 di ougùstùs na Beijing, miéntras ku e final maskulino lo tuma lugá den e stadion nashonal nobo di Beijing dia 23 di ougùstùs. E stadion nobo aki tin kapasidat pa 91 mil fanátiko.

OS: E hungadó di selekshon femenino di futbòl di Brazil Cristiane ta hasi un salto despues ku el a hinka un gol kontra e ekipo di Ghana. Brazil a klasifiká den repechahe pa Weganan Olímpiko na Beijing.