AMSTERDAM – PSV Einhoven a bira ayera kampion di Eredivisie, e máksimo kategoria di futbòl di Ulanda, pa di kuater aña siguí. PSV a gana e ekipo Vitesse Arnhem ku un gol di Danko Lazovic riba un paso di e delantero e peruano Jefferson Forfán na di 46 minüt di wega.
PSV tin awor 21 titulo den historia di futbòl ulandes, 8 ménos ku Ajax ku a keda na di dos lugá. Ajax a yega e último fecha ku e speransa ku desplasá PSV for di e título. E ekipo di Amsterdam a vense Heracles den kousa pèrdí 5-1.
PSV a klasifiká direktamente pa e próksimo Champions League ku 72 punto.
Ajax huntu ku NAC Breda (63), Twente (62) i Heerenveen (60) lo mester tene un repechahe pa wak ken ta e otro representante di Ulanda den Champions League.
E hungadó di Ajax Klaas-Jan Huntelaar a bira e MVP di futbòl ulandes e aña aki. Huntelaar tabata topscorer ku 33 gol i el a asistí den 8 anotashon pa un total di 41 punto. Na di dos lugá a sali Luis Suárez ku a haña 31 punto i e danes Kenneth Perez na di tres lugá ku 18 punto.


Spaña

Na Spaña Real Madrid ta karisiando e titulo di Liga Spañó. E próksimo fin di siman ya kaba Real Madrid por ta e kampion nobo di Spaña. Ayera e ekipo a gana Racing di Santander 2-0. Si Real Madrid superá riba e próksimo fecha Athletico di Bilbao i Villareal no gana Betis, e ekipo di e kapital spañó por yama su mes kampion faltando 4 fecha pa hunga.
Villareal a surgi na di dos lugá i a pone su mes na 10 punto di Real Madrid ganando Valladolid 2-0 ayera. Despues di dos derota konsekutivo, e ekipo a probechá di e falta di viktoria di Barcelona pa bai ku e di dos lugá i sigui lucha eventualmente pa e titulo. Barcelona a bolbe empatá djasabra, pa di kuater biaha siguí, ku Espanyol 0-0.
Real Madrid tin awor aki 72 punto, Villareal 62 i Barcelona 61.

Italia

Na Italia, e ekipo Inter di Milan tambe ta karisiando e titulo. Un gol di e argentino Julio Ricardo Cruz a pone e ekipo den direkshon di e “scudetto” ganando Torino 1-0.
Inter Milan tin awor 6 punto riba AS Roma ku djasabra a empatá 1-1 ku Livorno. Inter tin 78 punto i Roma 72, faltando kuater fecha pa final di e temporada.

Grecia

Na Grecia e ekipo Olympiakos a gana su di kuater título siguí di liga griego, pero e ta dependé awor si Korte di Arbitrahe di Deporte lo tin un sentensia kontra e klup. Olympiakos a derotá Iraklis 3-1 riba e último fecha di e temporada aki i a keda ku 70 punto. AEK a keda na di dos lugá ku 68 punto. E Korte ku sede na Suisa mester determiná si un protesta di e klup Apollon Kalamarias, ku a keda na último lugá lo prosperá. E ekipo a pidi pa kita punto for di Olympiakos pa motibu di e alinea un hungadó ku no tabata adekuadamente inskribí pa hunga na febrüari último. Si esei ta e kaso Olympiakos lo pèrdè tres punto i outomátikamente AEK lo ta e kampion.