MONTEGI – Ayera e piloto Danica Patrick a kombertí den e promé dama den historia pa gana un kareda di Indy konkistando e Gran Premio di Hapon, despues ku su kompetidornan prinsipal a haña nan ta pasa pit pa tuma gasolin den e último buèlta.
E merikano a kaba e kareda 5.85 sekònde dilanti di e brazilero Helio Castroneves kende tabata na kabes ora e kareda a ranka sali na Motegi, un sirkuito di 2.41 kilometer.
Ora ku tabata falta sinku buèlta mas pa e kareda finalisá, e lider na e momentu ei, Scott Dixon mester a drenta pit i a bin finalisá asina na di tres lugá, siguí pa e britániko Dan Wheldon i su tras e brazilero, Tony Kanaan.
“Despues di hopi tempu finalmente mi ta gana un kareda,” asina Patrick a bisa despues di a gana. “Tabata un kareda ku strategia di kombustibel, pero mi ekipo a hasi un tremendo trabou. Mi sa ku mi tabatin e mesun strategia ku Helio i ora mi a pas’é pa tuma e liderazgo, mi no por a kere. Esaki ta fabuloso.”
Patrick di 29 aña di edat a gana su promé kareda despues di su di 50 kompetensia kual e ta partisipá na dje.
“Danica ta fantástiko i ta duna mi un plaser ku su suerte a kambia,” asina Michael Andretti a bisa, ko propietario di e ekipo Andretti Green Racing. “Nos tur a kere den dje i awe el a demostrá, ku e ta un kampion. Mi ta kere ku esaki ta e promé viktoria den hopi pa sigui.
“Mi tabata sa ku tabatin un bon rason pa mi bin Hapon. Mi ke duna danki na tur ku a apoyá mi,” asina Patrick a sigui bisa.
Temporada pasá Patrick a kaba na di shete lugá riba e tabla di posishon, su mihó resultado di su karera. El a hasi historia tambe na 2005, ora ku e tabata un dado momentu na kabes di e kareda ei, e promé dama pa hasi esaki. El a kana Indy na di kuater lugá den su aña komo nobato i esaki ta un mihó resultado pa un piloto dama.