WILLEMSTAD - E presidente di Sindikato di Transporte Uní, STU, ta biaha mañan pa Cuba i Colombia, pa personalmente pone su mes na altura di e struktura di transporte públiko den e paisnan aki. Andres Everitz, presidente di STU, a splika ku su bishita lo ta konsentrá prinsipalmente na Cuba. Everitz tin kontakto poné kaba, den e paísnan latinoamerikano i ta e intenshon ademas pa risibí e informashon kon na prinsipalmente Cuba e transporte públiko ta funshoná. Ta interesante pa determiná, segun e representante dje shofùrnan di bùs lokal, ta kua ta e informashonnan ku por wòrdu apliká na Kòrsou. Everitz mes a finansiá su biahe pa eksterior. “E sindikato no ta den posishon pa paga pa mas hende biaha i mi direktiva ta sostené mi kompletamente”.
E informashon ku Everitz akumulá na Cuba i tambe posiblemente Colombia, lo e trese pa diskutié ku Gobièrnu.
Segun Everitz, su sindikato no ta kontentu kon diputado Godett ta atendé e asuntu di reorganisá transporte públiko. Everitz a reklamá ku diputado Godett no ta envolví e shofùrnan di bùs den su intenshonnan pa reorganisá transporte públiko. Segun Everitz, ku e diputado anterior tabatin e palabrashon ku e shofùrnan di bùsnan lo haña mas partisipashon, den e direkshon nobo ku lo duna na e sektor aki. “Nos tabatin palabrashon ku e Gobièrnu anterior pa huntu bishitá Colombia, pa tuma nota dje situashon di transporte públiko. Pero diputado Godett a bishitá Hulanda anto sin konsultá ku nos”.
STU tin e informashon ku Cuba ta trahando riba un struktura nobo pa su transporte públiko, meskos ku ta e kaso ku Brazil.
E presidente di STU ta konvensí ku lo e haña mas informashon balioso den e paisnan latino amerikano, kompará ku e loke diputado Anthony Godett a haña, durante di su resiente biahe pa Hulanda. “Na Hulanda ta trein i tram ta kore”, asina Everitz a remarká, indikando ku esaki no ta e tipo di informashon ku nos tin mester di dje na Kòrsou”.