WILLEMSTAD – “Loke Komishon di Energia a logra ta simplemente un bèrgwensa. Un bèrgwensa ku un komishon a tuma 4 siman largu pa bin bisa nos loke nos tabata sa kaba”, asina presidente di partido Niun Paso Atras Carlos Monk a reakshoná.
Monk a bisa, ku ta inkreibel ku un komishon ta tuma 4 siman largu, despues ku anteriormente a pretendé ku tin alternativa pa e oumento di preis di kombustibel, pa awor presentá loke nan a presentá.
Pió ainda: kaminda ta pidi mas tempu pa kaba e trabou.
Carlos Monk a mustra, ku niun di e rekomendashonnan ku e komishon a presentá no ta representá algu ku ta berdaderamente nobo.
Asuntu di bai Venezuela pa negoshá un mihó preis ta kos ku nos tin añanan ta papia riba dje kaba.
Redukshon òf eliminá di OB i akseins riba gasolin ta aparesé riba e lista di proposishon ku diputado Eugène Rhuggenaath a bin kuné algun tempu pasá.
I tur hende ta enfatisando e importansha di un kampaña di konsientisashon. Realmente, nada nobo, segun Monk a mustra.
El a bisa, ku el a sinti falta di otro posibilidatnan manera por ehèmpel kon atendé ku e kompanianan di energia Curoil i Aqualectra.
“Tin por ehèmpel un problema ku e desperdisio na Aqualectra. Esaki ta un faktor serio ku mester ser atendé”, segun Carlos Monk.
“Tin mas posibilidat kaminda ta atendé e krísis di energia na un forma mas profundo. Pero nos no a weta nada di e kosnan aki den e rekomendashon di e komishon”, di akuerdo ku presidente di Niun Paso Atras.
Por sierto ku miembro di e frakshon di Niun Paso Atras den Konseho Insular mr. Aldebert Rooijer a manda un seri di pregunta pa gobièrnu di Kòrsou, den kua básikamente e ta puntra kiko e komishon aki a kosta.
“Nos ke sa kuantu te, kòfi, djus ku pastechi nan a usa, pa despues bin bisa nos un kantidat di kos ku nos sa kaba,” Rooijer a bisa den un splikashon adishonal.
“Ku ta konsiderando pa eliminá OB i tambe akseins riba gasolin pa asina redusí preis ta kos ku nos sa kaba. Ku por hasi intento pa haña un tarifa spesial di PDVSA tampoko ta algu nobo. Mi ke sa si e komishon aki a sinta gastu tempu pa bin bisa nos tur e kosnan aki, ku ta kos ku nos sa kaba”, di akuerdo ku Aldebert Rooijer.