WILLEMSTAD – “Ulanda ta un partner konfiabel. Tin masha kos ku polítikonan di oposishon ta bisa di Ulanda, pero no ta parse ku tin e disposishon pa sinta na mesa i papia”, sekretario di Estado pa Relashon den Reino Ank Bijleveld a deklará.
Bijleveld a hasi e deklarashon aki despues di un diskushon – basta fruktífero – ku e tabatin ku hóbennan antiano, organisá pa Vereniging Antilliaans Netwerk (VAN) na Ulanda.
Sekretario di Estado Ank Bijleveld a duna un relato amplio di e desaroyonan rondó di e trayekto di restrukturashon estatal ku ta tumando lugá na Antia.
Tabata un enkuentro fruktífero, pero kaminda tabatin hopi krítika tambe riba e aktitut di polítikonan ulandes kontra Antia.
Ekspreshonnan manera esnan di Hero Brinkman i Geert Wilders a subi mesa i a konfrontá e sekretario di Estado ku nan.
“Mi no ta kere ku mi ta bisando algu nobo, si mi bisa ku e ekspreshonnan aki no ta karga aprobashon di gobièrnu ulandes. No ta punto di bista di gobièrnu nan ta. Tin hopi polítiko ku ta hasi deklarashon fo’i sla. Pa ami, ta simplemente ko’i kèns esakinan ta. Onzin. Kletskoek,” asina Bijleveld a afirmá.
Bijleveld a bisa ku e ta duna mas importansia na un diskushon entre polítikonan ulandes i esnan di Antia. Nos mester start e diskushon aki.
“Oposishon na Kòrsou ta grita pafó di sala, pero no ta dispuesto pa sinta papia,” Bijleveld a bisa.
E tabata referí aki opviamente na e susesonan durante su bishita di mas resien na Kòrsou, kaminda partidonan di oposishon a blòkiá e outo den kua e mester a bai Konseho Insular. Esaki a sosodé dilanti katedral di Pietermaai.
Siman pasá tabatin tambe hopi komentario di e deklarashonnan formulá pa e miembro di Raad van State Hubert Maduro di Aruba.
Maduro a kalifiká e proseso pa restrukturashon di e islanan komo un “puinhoop”. Maduro a konkluí ku ta dedikando atenshon solamente na e aspekto hurídiko.
Ank Bijleveld no ta di akuerdo ku esaki. El a rechasá ku ta dunando atenshon na solamente e parti hurídiko estatal.
Pa nos ta bai loke e ta nifiká pa e hende. E habitante di kada isla. Ta bienestar di e habitante ta loke finalmente ta konta, el a bisa.
Bijleveld ta haña straño tambe ku ta bisa ku e trayekto no ta basa riba un vishon.
“Mi ta haña straño, pasobra nos a pone e vishon bon kla den e Akuerdo Final,” di akuerdo ku e sekretario di Estado.
“Ku e klima polítiko ta birando dia pa dia mas duru, ta un kos ku si e sekretario di Estado ta di akuerdo kuné. Pero mi ta haña ku ta un punto ku nos mester traha konhuntamente riba dje”, el a añadí.
Pa loke ta St. Maarten, Bijleveld a bisa ku te ainda ta sali for di punto di bista ku e deseo ku St. Maarten tin riba tereno estatal ta un kos ku ta posibel. Si no t’asina, anto ta un konklushon ku mester yega na dje ainda, e mandatario ulandes a bisa.
Dunando su opinion riba e proposishon di parlamentario di VVD Johan Remkes pa e islanan kuminsá pensa riba e posibilidat pa forma un mankomunidat ku Ulanda mirando ku e proseso aktual ta tardando demasiado, Bijleveld a bisa ku e tambe a tende e kos ei, pero ku e no ta weta motibu pa kuminsá pensa den otro direkshon.
“Si Remkes ta haña ku e proseso ta durando demasiado, mi ke kòrd’é riba algu ku e mes a yega di bista resientemente, esta ku mihó bai ku koutela, ku kore hasi kos purá-purá. Zorgvuldigheid voor snelheid. Ta su mes palabranan esei tabata,” segun Ank Bijleveld.