WILLEMSTAD – Ora un buraku den kaminda, un tapa di riol òf kualke otro situashon okashoná daño na un vehíkulo, e outomobilista mester keda na e sitio te ora polis, CRS òf SKS yega na e sitio. Pa DOW por kubri e daño kousá, semper e outomobilista mester di un prosèsverbal.
Esaki ta loke A.T.S.K. ta informá tur outomobilista. E asosashon ta risibiendo hopi yamada telefóniko di outomobilistanan ku ta reklamá, ku pa motibu di mal estado di kaya nan vehíkulo a sufri daño. Tambe tin diferente outomobilista ku ta akudí personalmente na ofisina di A.T.S.K. pa por entregá un petishon kompañá ku resibu di e daño okashoná na e vehíkulo.
Relashoná ku esaki A.T.S.K. ta haña ku ta na su lugá pa trese lo siguiente dilanti: A.T.S.K. ta konsiente ku tin kayanan aki na Kòrsou ku ta den hopi mal estado. Pero A.T.S.K. ta konsiente tambe ku resientemente Diputado Anthony Godett a anunsiá ku el a duna D.O.W. ya kaba enkargo pa drenta den barionan i kuminsá yena e burakunan ku tin riba kaya, i kaminda esaki ta nesesario ta drecha e infrastruktura tambe. A.T.S.K. a tuma nota ku yenamentu di e burakunan ta tumando lugá. Esaki ta nifiká ku e trabounan pa drecha kareteranan ta kanando i no ta tur bario ta asina leu.
Mas aleu e asosashon ta informá, ku si riba e kareteranan ku esaki no a tuma lugá ainda, un vehíkulo sufri daño pa motibu di mal estado di e kaminda, i e outomobilista por prueba esaki, A.T.S.K. ta supliká pa hasi lo siguiente:
1. Bou di niun sirkunstansia bandoná e sitio kaminda e daño a keda okashoná; 2. Drenta den kontakto mes ora ku sea polis òf S.K.S. pa nan por tuma nota di e situashon i traha un rapòrt. 3. Ku e rapòrt akí e persona konserní por akudí na e sekshon di “werkplaats” na D.O.W. pa deponé su kleim. 4. Si e persona konserní no ta satisfecho ku e resultado di e kleim, semper e tin e derecho pa buska su derecho den Korte.
A.T.S.K. ta spera ku outomobilistanan a tuma bon nota di lokual a keda tresé dilanti.