Grupo di periodista Mericano di bishita na Aruba

ORANJESTAD- Recientemente Aruba Tourism Authority a invita un grupo di periodista Mericano pa bin bishita nos isla y asina ricibi tur información encuanto di e ultimo desaroyonan cu a tuma lugar ariba nos isla.
E contacto principal tawata e compania Quinn & Co, kende a zorg pa manda invitacion pa un lista di periodistanan clave di cual 4 a wordo escohi pa bin Aruba durante un asina yama “US Press trip”, mientras cu Marriott Aruba Resort and Stellaris Casino tawata e hotel anfitrion.
E programa a wordo coordina pa Sra. Nathalie Maduro, PR Liaison pa ATA, mientras cu Srta. Eileen Almonte di Quinn & Co. a biaha cu e grupo.
E diferente medionan cu a wordo escohi tawata, Houston Chronicle, Catalina Magazine y tambe un programa di televisión special cu nan ta produci, Elle Québec y Cruise ship on board Magazine.
Durante nan estadia, ATA asegura pa pone un tiki di tur cos, cu e cooperación varios miembro di AHATA, manera entre otro, bishita na e Butterfly farm, Aruba Aloe, Museo Historico, Parke Nacional Arikok, tambe nan a disfruta di un Jeep Safari Tour, bishita na De Palm Island, un paseo den catamarán, bishita na diferente di Aruba su beachnan. Tambe nan a reuni cu Sra. Gina Lopez-Gnecco, PR Director pa ATA y Sr. Mario Arends, Marketing Manager USA, kende nan a conbersa cu e periodista nan, contestando diferente preguntanan clave y tambe a expresa nan opinión encuanto di henter e biahe y kiko ta nan percepción di Aruba como un destinacion turistico.
Pa asegura cu nan a ricibi un bon cobertura di Aruba su diferente posibilidadnan culinario nan a bishita diferente restaurant manera entre otro, Pincho’s Bar and Grill, Charlies Bar, L.G. Smith, Papiamento y finalmente ariba nan ultimo anoche nan a disfruta di un tremendo cena di despedida na The Simply Fish restaurant na e prestigioso Marriott Aruba.
Durante e cena aki, e periodistanan a disfruta di un cena ariba beach y e anfitrion nan pa e anochi tawata Srta. Karen Swiers, PR Manager pa e hotel como tambe Sr. John Woolley, Director of Sales and Marketing pa e hotel.
E periodistanan a keda sumamente encanta cu Aruba y principalmente e clima cu nos tin. Tambe nan a keda asombra cu Aruba su infrastructura y cu e diferente posibilidad nan cu tin disponible pa tanto famia, parehanan y tur persona cu ta gusta deporte aquatico.
Un biaha mas, Aruba a sa di impresiona tur e medionan internacional y ATA pa medio di esaki tambe kier a gradici tur persona y compania cu e duna nan sostén pa cu e grupo aki. ATA lo publica cualkier articulo cu Sali publica pa asina comparti cu e pueblo di Aruba e promocionan internacional cu nos isla lo ricibi den exterior.