WILLEMSTAD - Awe mainta durante di un akshon di morkoi, e shofùrnan di bùs, organisá den Sindikato di Transporte Uní, STU, a entregá un karta na Bestuurscollege.
Presidente di STU, Andres Everitz, kende porsierto awe mester sali riba un biahe di trabou pa Cuba i Colombia, a bisa awe mainta ku djasabra último e sindikato tabatin un reunion general. Durante dje enkuentro aki direktiva di STU a haña mandato di su miembronan pa kuminsá akshoná. “E miembronan ta hopi malkontentu ku e forma kon Gobièrnu ta trata nan”, asina Everitz a splika. “Kada bes Gobièrnu ta tira informashon den medionan di komunikashon loke ta trese konfushon den komunidat. Ta p’esei nos a bin Bestuurscollege awe i despues di awe si Gobièrnu nò tuma un posishon, nos ta bai all the way”. E presidente di STU a sigui splika ku e shofùrnan di bùs chikí no ta tolerá mas e trato ku nan ta risibiendo serka Gobièrnu. Everitz: “Nunka nos no a molestiá ni tampoko Gobièrnu ku nada. Pero nos sí ta wòrdu pisoteá regularmente. E bosero dje shofùrnan di bùs enfátikamente a bisa ku e sindikato ke papia awor ku Gobièrnu.
Durante di e akshon awe mainta, segun Everitz, nan a purba di tene e servisio balansá, pasobra den e oranan dje akshon, e pasaheronan a baha un poko. Segun Everitz, e shofùrnan di bùs ku sí a keda kore, a keda pendiente pa kualke yamada, pa nan tambe drenta den akshon.
Mas despues gezaghebber interino, Magaly Jacoba, a tuma e karta di e shofùrnan di bùs i el a primintí atendé e kaso ku e diputado konserní, Anthony Godett. Everitz a insistí ku ta te ku djaweps nan ta duna Gobièrnu oportunidat pa reakshoná. Riba esaki, gezaghebber interino enfátikamente a bisa ku e no ta gusta asuntu di preshon i menasa, pero ku e ta bai hasi loke ku el a primintí, ku ta tuma kontakto ku diputado Godett. Despues ku esaki tuma lugá, gezaghebber interino lo tuma kontakto ku e sindikato, pero e no por primintí ku esei lo ta promé ku djaweps awor.