WILLEMSTAD - Ulanda lo reservá 90 kamber pa studiantenan di Kòrsou ku kada aña di nobo ta biaha pa e pais aki pa kontinuá ku nan estudio mas avansá. Ademas lo bin un mihó guia pa hóbennan di nos isla ku ta yega Ulanda promé biaha.
Esei ta algun di e puntonan riba kua diputado di Enseñansa Marilyn Alcalá- Wallé a logra un akuerdo durante su bishita na Ulanda. Awe mainta e diputado a subi avion, rumbo bèk pa Kòrsou, pero Desiree Martis di Radio Nederland Wereldomroep a papia kuné djis promé ku el a entamá e biahe di regreso.
Manera ta konosí, e mandatario a bai Ulanda ku un agènda basta yen, entre otro e asuntu di finansiamentu di estudio pa kua e tabata ke yudansa di Ulanda.
Manera LA PRENSA a informá for di siman pasá, Ulanda ta dispuesto pa yuda Kòrsou den e problemátika di finansiamentu di estudio. “Ulanda opviamente a mira ku nos ta serio den e asuntu aki i e disposishon pa yuda t’ei”, asina diputado di Enseñansa Marilyn Alcalá-Wallé a duna di konosé.
Básikamente tin tres trayekto ku diputado Alcalá- Wallé a enfoká riba dje, esta e situashon agudo kaminda mester di plaka pa paga studiante fin di e luna aki, e trayekto kaminda gobièrnu di Kòrsou mes ta bai studia kon e por aloká fondo riba presupuesto insular pa sigui atendé ku SSC pa sobrá di e aña aki i e trayekto pa un solushon duradero, ku ta un sistema nobo di finansiamentu di estudio ku ta duna mihó rendimentu, segun e diputado.
Manera indiká anteriormente, e pago di beka pa fin di e luna aki en todo kaso ta garantisá.
Alohamentu pa studiantenan di Kòrsou semper tabata doló di kabes. Tur aña di nobo ta resultá ku no tin sufisiente kamber disponibel, di manera ku na último momentu mester buska un solushon di emergensia. Ayera e diputado a papia ku tantu wethouder komo alkalde di Rotterdam Ivo Opstelten riba e problema aki.
A palabrá ku ta gobièrnu munisipal di Rotterdam lo atendé e asuntu aki di un otro forma. Lo reservá un 90 kamber pa studiantenan ku tur aña ta yega Ulanda pa sigui studia. Esaki, na analogia di loke ta sosodiendo kaba na Den Haag. Aki por papia di tantu studiantenan di Stichting Studiefinanciering Curacao komo tambe di studiantenan ku ta yega Ulanda sin ku nan ta kai bou di finansiamentu di SSC.
Eksperensia a siña ku tur aña tin mas o ménos 90 studiante ku ta establesé na e siudat aki.
E loke a sosodé anda pasá por ehèmpel, kaminda dado momentu asta tabatin asuntu ku kier a pone e studiantenan riba boto di biba, no mag di sosodé mas.
Por sierto ku e direktor nobo di SSC Jonathan Jukema tambe tabata presente durante e deliberashonnan.
Un otro punto interesante ta e palabrashon ku Ulanda lo pone plaka disponibel na 5 “hogeschool” na e 5 siudatnan mas grandi na Ulanda. Lo usa e plaka segun nesesidat. Na Den Haag lo usa e plaka ei pa studiantenan di Kòrsou.
Lo usa e plakanan aki, konosí komo “Plasterkgelden” (Ronald Plasterk ta minister di Enseñansa di Ulanda) pa tantu e studiantenan di SSC komo tambe esnan ku ta sigui studia sin yudansa finansiero di e fundashon aki. Lo usa e plaka aki pa duna guia na e studiantenan ku yega Ulanda i ku tin problema ku e kambio di kultura, esta esnan ku ora nan yega, tin difikultat pa sigui ku nan bida manera nan a kustumbrá.
Un otro punto riba kua tambe a logra un akuerdo ta e asuntu di guia pa mucha chikí. Manera ta konosí, resientemente a aprobá e “Wet op Kinderopvang” i Kòrsou ta konsiderá nesesario ku e mester di yudansa di Ulanda den ehekushon di e lei aki. Por sierto ku e diputado a ofresé e dokumentu ofisial na alkalde Ivo Opstelten. A palabrá ku den kuadro di e lei aki, ta lanta un órgano di inspekshon i esnan ku ta bai hasi e trabou aki, lo kore stazje na Ulanda. Den esaki Rotterdam lo duna un man.
Diputado Alcalá-Wallé a ekspresá su satisfakshon pa e forma ku su bishita di trabou na Ulanda a kana.